Dang ha kini ki sngi wa dep da yoh u yoo yei sdang khai im biang ki yaw poh dong kiwa jooh krehkaam heipor Lockdown yong u snem 2020, neidaw wa khang ki bor District u wai yaki yaw heh kam ha Iawmusiang wa ha Iawthymme, ynne ka sngi won kawa man ka sngi wa le i e laad yaki yaw dai marbam hadien wa da booh kyndon wow kdoh u khoom (Containment Mesures) yaka Jowai nadooh ka 1 tarik uni u bnai, da sakhi wa ynne ka sngi da nang boon ki yaw poh dong wa krehkram wa kynthup ha Ladthadlaboh, Chutwakhu, Tympang Iawmusiang wa kiwi.
Napyrdi kini ki yaw dong wa krehkaam ynne ka sngi hapoh i pait i sylli ki bor chnong waphær waphær, yaka yaw dong yong ka dorbar chnong Tympang Iawmusiang da hap u pynsangeh noh chiteiñ sngi neidaw wa ki paidbah wym ye ki u bood ya ki kyndon yada naka khlam COVID-19.
Seiwi leh i daw wa boon bru ware ha Iawmusiang ki paidbah wa wan thied wan pet wym du ki tre dong kamwa man hi ko ka yaw wa man pyrdi, ki bru da wan ki na kylleiñ.
Ha kani ka jooh ka sngi neiliang ka dorbar Tympang Iawmusiang da pynbait ko wa nadooh ka 10-05-2021 u sdang noh u wai yaw deiwa pynemkam yaki Odd/Even Number ya waroh ki dukan.
I krehkaam ki Odd/Even Number u kynthup leh yaki yaw wada em jar jiar ki Market Committee ha Iawmusiang, katwa ya kiwa chong dai ha Pohyaw wa kiwa chong dukan rood sarok, hap ki wow wan chim ya ki Number na ka yung krehkaam ka Dorbar Chnong Tympang Iawmusiang.
