Heiyatoh waka mukotduma wa da yaleh neibynta i khooid ka nan Umiam wa da yaleh ha ka High Court ka Meghalaya wei da chong bichaar da u Justice Sanjib Banerjee, Chief Justice wa u Justice W. Diengdoh da pynmih hukum ki ha ka 7 tarik uni u bnai deiwa ong wa da yoo lakam ka jylla da khyrngiat ko hajrong ini i kaam. Deiwa ong leh wa hap wow pynkrehkaam ya ki kaam wa da booh thong slem wa kiwa hap wow leh katni wot neidaw wa da ku kiwa uiñke suwari kiwa wan chapoh ka jylla.
Da ong leh wa emkaam wow ya krehlang wa ki dorbar chnong wei hap leh wow booh kiwon ki kaam wa chah u leh wa kiwon ki wym chah u leh wa hadooh kiwon ki thaw wa kiwa uiñke suwari ye ki wow lai khamtam charood ka um, hadooh heiwon hoi u psiah ki kari, ki thaw pynyieñ kari wei wow khang leh yei pynemkaam Plastic.
Ka jylla lada sñiaw biang ko toh u booh ko ya ki bynta wym hoi u pynemkaam ya ki Plastic.
Da kdaw leh wa em boon ki wah wa lai lyngba ka Shillong wa kiwi ki chnong kam ka Nongstion kiwa emkaam wow pynim biang wei i rukom lai rukom kooid ki kwah toh u pynneh pynsah ki wei wow booh kyndon kammon wa ye ki paidbah u pynemkaam ya ka um deiwa pynyoo iwon wa hoi u leh wa kiwon ki wym hoi u leh namo ki “Do’s & Don’ts” deiwa booh da ki Signboard ha waroh ki thaw uiñke suwari kamjooh ki Number wa ye ki bru wow Phone wow ujor wei wow ya krehlang wa kitu kiwa kwah wow yada ya ka rymaw.
Chooh chooh da ong wa toh u yaleh katwa ye yow pynim ya kiwa im hapoh ka um nadooh ki phlang ki dohum.
Heijooh i por da ong leh wa toh leh ya iwa emkaam yow khang noh ya ka thaw noh jhep wa tip kam ka Marten lada man ko kawa da chlai lada yoh thaw da iwi wow pynemkaam.
Ya kani ka mukotduma daw chong bichaar biang ha ka 03-06-22.
