U DC ka West Jaiñtia Hills District da pyntip u wa katkam ka hukum wa da pynmih ka Meghalaya High Court ha ka 06-12-2021 heiyatoh wow pynjoor yei e tika kamjooh wow pynsñiawthooh yei myntoi nei chim tika, wei da e bor leh ya ka jylla wow booh kyndon ko neibynta ki wym bien u chim tika yow lait ki wow booh hei maa ya kiwi tawon.
Neiliang u DC da ong u wa i e tika hapoh ka ri deiwa kheiñ ya ka jylla Meghalaya da em ko hei wa le na tre dooh katwa ka West Jaiñtia Hills District won da em ko hei wa ar na tre dooh hapoh ka jylla wei ini i duna kiwa chim tika daw ye ko wow wanrah yei mih sa kiwi ki jait khñiang khlam heiwa yeini do yoo ha kini ki ar snem wa da lai iwa da ktah leh ya ki khynnah ki wym pu em pynkhreh tika ya ki hadooh katni.
Chooh chooh hapoh ka District da dep wow pynman yei e tika wa kyrpang hapoh ka Laskein Block, Thadlaskein Block, Amlarem Block wa ha ka chnong Jowai yow e laad ya waroh wow wan chakhmat wow chim tika wei ya kitu ki wym kwah u chim da pynlait du deiwa em ki daw wa yatoh wei chait i khiah deiwa pynsakhiat da ki Doctor.
Kamtæ u DC da ong u wa hadien wa da dep leh yeini waroh wei wow yada ya ka District kamjooh ya ka jylla na u jait COVID-19 wa thymme khamtam u jait Omicron , da pynmih da ka hukum hapoh ka Section 144 Cr.PC deilang waka Regulation 3 ka Meghalaya Epidemic Diseases, COVID-19 Regulations 2020 wa:
Ki bru ki wym bien u chim tika hap ki wow wanrah/pynyoo ya ka Negative RT-PCR Test hawa lai embynta ki ha ki yalang paidbah, ki yalang yong niam, ki yalehke Sports lane kiwon kiwon ki yalang wa boon bru.
Kiwa tyngkheiñ yeini daw chah pynchitom ki deilang waka kuna hapoh ka Section 51(b) ka Disaster Management Act, 2005.
Da phah leh ya ki paidbah kiwa da biang rta wow wan ki chakhmat wow chim yei tika neibhah i tika ye i wow yada nei chah ktah joor ha u COVID-19.
Wow pyn myllieñ u yajngai uwi ya uwi ym duna ya 6 phut hawa em cha lait wa ki thaw paidbah, u deiñ ya ki Mask wa ar-rtap lane da ki N-95, u siat khooid wei wow lehkhooid ya ki kti deiwa pynemkaam da i sabon waka um (40-60 Second) lane deiwa pynemkaam da ki Hand Sanitizers (20 Second).
Toh leh wow tymmoh bha yei ktien wei khmut hawa ky’oh wei synrieh wei wow yait nei mynthu ha ki thaw paidbah.
Lada em wa yoh ki dak ki chin wa chitom, ye ki wow Phone ha u Helpline 14410 lane deiwa lai cha kiwa jan dooh ki thaw sumaar kam ki CHC wa PHC.
Da kyntu leh ya ki paidbah wow yait nei lai cha ki thaw wa boon bru.
