U DC ka West Jaiñtia Hills da pynmih hukum u ynne ka 25 tarik kam chibynta wow bood ya ka hukum ka High Court ka Meghalaya kawa da pynmih ha ka 23 tarik uni u bnai deilang wa ki kyndon wa da pynmih da ka District heiyatoh wa i artatien ki bru wow chim yei tika COVID-19 deiwa bood leh ya ka hukum ka Health & Family Welfare Department kawa da pynmih ha ka 22 tarik uni u bnai deilang wow pteiñ ya ka hukum ka yung krehkaam u DC kawa da pynmih ha ka 19 tarik uni u bna heiwa da phah wow leh ya kini ha wah khlem pep:
Waroh ki dukan, ki yung krehkaam (sorkar/bru samen), toh u booh ki ya i dak “VACCINATED” ha i thaw wa chynna bha hakhmat ki dukan lane ki yungkrehkaam iwa chynna lada em ki bru 6 phut i jngai na i dukan. I booh ya i kyntien “VACCINATED” toh lada waroh ki wakreh lane kiwa chong dukan da dep ki wow yoh tika. Kamjooh leh ya ki dukan wa ki yung krehkaam hap ki wow booh ya i “NOT VACCINATED” lada ki wakreh lane kiwa chongdai dukan toh kiwa ym em chim yei tika. Ya ki wym leh ya ini wa da phah, da e bor ya u SP, ki Executive Magistrate wa ki heh pulit wow phah khang ya ki dukan lane ki yung krehkaam.
Ki kari kamai wa kyntup ya ki Local Taxi, Auto Rickshaw, Maxi Cab, ki Bus leh toh u booh ki ya ki dak “VACCCINATED” ha i thaw wa chynna bha ha ka yit kari lada kiwa yah kari, ki Conductor wa kiwa yarap ya ki da yoh ki yei tika. Katwa kitu ki wym em chim yei tika toh u biah ki ha ka yit kari “NOT VACCCINATED”. Ya ki wym leh ya ini, da e bor wow phah sngeh yei kamai ki.
Ya kitu won kiwa chongdai yaw kiwa da e thaw ya ki da ki Market Committee/Dorbar Chnong/Jowai Municipal Board yow dai jhoor, soh wa kiwi kiwi katkam wa chah, hap ki wow em ya ka Certificate wa e da u Waheh Chnong wa em yei pyrtuid, thaw sah, Mobile Number wa lada toh kiwa da dep yoh tika namo ki wym pu em yoh tika iwa mut Vaccinated lane Not Vaccinated.
Ya kitu ki wym bien u chim tika kiwa yang dukan, kiwa chongdai cha yaw wa ki wakreh ha ki yung krehkaam, hap ki wow phah leh Test RT-PCR khlem pep man ka 10 yow chngaaiñ wei wow yada ya ka imlang sahlang.
Waroh kitu kiwa chem kiwa man kam ki High Risk Contact da ki Sector Magistrate/BDO/Medical Officer/Police Officer hap ki wow phah Test da ka RT-PCR yow kdoh u khoom yei poor ka khlam. Ki CCMT wa ki Contact Tracing Team toh u man ki kiwa paitbniah ya kitu ki thaw pynman khayi pateiñ wa em ki bru ki wym pu em chim tika kamjooh ki wym em phah Test yow ye wow leh yei booddien.
Lada em kiwa pyrchang wow pynpoor ya ka ki khubor hamsaya da uwon uwon u bru næ ki seiñ deiwa yahbkla yei rukom krehkaam i tika, daw chah pynchitom ki katkam ka aiñ.
I wai ki dukan wa i rukom lai ki kari kamai u man i katkam ka hukum wa da pynmih neipor cheipor da ka yung krehkaam u DC.
Kani ka hukum toh kawa krehkaam nadooh wa sdang ka 01-07-21.
