Ka High Court ka Meghalaya ynne ka sngi lyngba u Chief Justice yong ka u Justice Biswanath Samadder da pynmih hukum ko hajrong i wym chah u wai dukan lane wow lai kamai kitu ki wym em chim tika hadien wa pynmih hukum ka DC ka East Khasi Hills.
Ka yung bichaar ha ka hukum da ong ko wa i chim yei tika toh iwa emkaam dooh ha ini i por lada ym toh iwa ym hoi u dam u chim yow ye u jop ya kani ka khlam kawa da ktah ya ka pyrthai waroh kawi.
Heiyatoh won wow pynmih hukum wym hoi u dam u chim yei tika, da ong wa katkam ka Article 21 kawa da klam leh yei hok wow yoh yei chait i khiah kam i hok manbru, kynthup ko leh yei hok wow yoh ya ki tika. Tangwa u phah chim tika deiwa pynbor iwa da ktah kylla won yei hok wow im-ja ki bru da man leh iwa da ktah yei hok wow im u bru, kamtæ ym ye wow khang yei hok ki bru wow im-ja.
Ka hukum da ong leh wa ka Ministry of Health & Family Welfare ym em ong ko wa i chim tika ym toh wa ym hoi u dam wei toh i mon laitlooid ki bru yow yada ya idæ wei wow yada ya kiwa hayung hasem wa kiwa ya krehlang. Heiwa ka Ministry da sneiñ ko wa toh u chim ya ini i tika.
Da ong leh wa hap wow pyrkhat wa neidaw wym bien uwi wow chim tika da booh won ko hei maa ya kiwi kiwa boon iwa da ktah won leh yei hok yong ki wow im, kamtæ hap wow pyrkhat yei hok yong uwi kamjooh yei hok yong kiwa boon wa ym toh u noh chilliang ko.
Chooh chooh da ong wa i pyrchang wow pynbor wow chim yei tika nadooh 100 snem nachwa ki yung bichaar da pynmih hukum ki pyrchah ya ini.
Kamtæ ka yung bichaar da sñiaw ko wa ka lyngkor toh i yong ka sorkar wow kit yow pynsñiawthooh paidbah hajrong i e tika deiwa khana yei myntoi wa ki dooh myntoi khamtam cha i cheini wa em boon kiwa artatien, khamtam kitu kiwa wan na ki bynta ka imlang sahlang kiwa em cha rood cha kdong hapoh ka jylla kiwa yoh chiboon ki yutip wa yah bakla na ki kattu katni ki bru kamjooh ki seiñ kiwa em ka yong ki ka thong wa cha kylla.
Da ong leh wa ka sorkar jylla toh u lailang ki wa ki bru ha kam kini ki por heithaw wow pyndooh yei laad kamai ja-kpoh ki deiwa pynsñiawthooh ya ki yei myntoi wa i bha wa mih nei chim tika.
Heiyatoh won wa da pynklla ka DC ya ka hukum deiwa phah ya waroh ki dukan, kiwa khayi wa kiwa kamai kari wow pynyoo ki hei dur ki Sign/Poster wa lada ki toh kiwa da dep chim tika yow tip ki bru paidbah wow jied, heiwa ym em de khang ya ki bru wow wai dukan lane wow lai kamai ki khlem yoh tika, neiliang ka yung bichaar da mynjur ko ya kani ka hukum deiwa ong leh wa hei sñiaw yong ka toh u leh kamni hi.
Deiwa pynksan chooh chooh ya ini, ka High Court da ong ko waroh ki dukan, ki thaw kreh ki kari kamai hap pynyoo ki wa da dep chim tika lane ym pu em chim tika deiwa booh ya ki kyntien “VACCINATED” lane “NOT VACCINATED” wei kiwa leh pyrchah daw chah khang ki.
Ka yung bichaar da sñiawkhia ko yeini i artatien ki bru wow chim yei tika wei daw booddien ko ya ini yow ye ka sorkar jylla wow jop ya ini yow ye u poi cha ka thong katkam wa da booh heipor wa da booh.
Ka yung bichaar ha ka hukum da maham ko leh lada em uwon uwon næ kawon kawon ka seiñ wa pynpoor ya ki khubor thok pyrchah yei krehkaam i tika hapoh ka jylla. Ki bor ka aiñ toh chisyndon u lai ki chakhmat katkam ka aiñ pyrchah ya kini wei toh u pyntip ki leh cha ka yung bichaar hajrong ini.
