Ka Dr. M. Ampareen Lyngdoh kawa man ka Montri hapoh ka sorkar MDA-II da ong ko wa man iwa emkaam wow pynkynmoo ya ka sorkar India wa ki paidbah ka jylla Meghalaya ym sñiawthooh wei ym tip ki wow klam Hindi.
Ini i klam ka Ampareen toh hajrong i mih noh ki 4 ngut ki MLA ka VPP napoh ka yung dorbar neibhah wa klam Hindi u Lat ka jylla, u Phagu Chauhan ynne ka sngi sdang ka dorbar mang tangka.
Da ong ko leh wa biang hi iwa jia ynne yow pynkynmoo biang wa i ym toh kiwa klam Hindi tangwa heiyatoh wa u Lat da ong ko wa da tip chwa wa ymtip u wow klam English wei ym ye wow leh iyi iyi leh.
Kam wow pynkynmoo wa ka Dr. Ampareen da pyrchah ko leh ha u snem 2018 yei klam dei ktien Hindi da u Lat ha itu i por, u Ganga Prasad. Wei hadien itai i klam Hindi yong u Lat, ka Dr. Ampareen kawa em ha ka Liang Pyrchah ha u snem 2018 da klam syndon ko dei ktien Khasi wa kynthup leh ya u Adelbert Nongrum uwa da e lang yei klam da ka ktien Khasi.
Kamtæ da ong ko wa hanla em ko katni hei Liang Synchaar ym em mut wa da kylla ka yurim wa yieñ ko tangwa hap bood ya ki kyndon kammon wow pynsñiaw yei pyrchah deiwa ban joor ko wa kmen ko wa da em biang wa wanrah ya kani ka phang sa chisien da ka Liang Pyrchah.
“Ka sorkar India toh u tip ko wow phah Lat da uwa ye u klam da i ktien wa sñiawthooh ki paidbah wei ym toh iwa bakla wow thoh cha ka sorkar chaphang ini,” da ong ka Ampareen.
