Shillong: Ki ar ngut ki kyrtong wow yakhun ya ka Election MP cha Lok Sabha kiwa da chah pynsangeh chwa yei man kyrtong ki, hadien wa da bichaar ya ki kot ki sla da u Returning Officer ka Shillong Parliamentary Seat, ki kyrtong da hap lai ki wow hajir biang ynne ka sngi hakhmat u RO, u Abhishek Bhagotia.
Kini ki ar ngut ki kyrtong kynthup ki ya u THS Bonney uwa da thep pyrtuid kam u kyrtong ka KHNAM, tangwa ynne ka sngi da rai wow yakhun noh kam u kyrtong laitlooid hadien wa ka High Court ka da pynksan ko ya u Pyndapborthiaw Saiborn kam u President ka KHNAM. Katwa u kyrtong laitlooid wa da chah kyntait neidaw wa sah ram u ha ka Bank, u Justice Kharbasanti da randien noh u kam u kyrtong.
Hawa yaklam wa kiwa thoh khubor, u Bonney da ong u i por da tbian ware i wow yasait ya ka humkum ka High Court wei neiliang u RO leh da pyrchang wow yarap wei hawa kut da e laad wow yakhun noh kam u kyrtong samen ha ka chap yong u chabi.
Da ong u wa kani ka rai ym toh katkam i mon yong oo tangwa da chim ya ka neidaw wym banse wow yoh yakhun Election.
Ha iwi tawon i liang da ong u wa hadooh katni ym pu che uyi u President ka KHNAM neibhah haka mukotduma wa yaleh u Pyndap wei ha ka hukum wa da pynmih da ka High Court leh ym che ko.
Discussion about this post