Hadien wa da yoh yei ujor yei wym chimkhia ki Nurse ha Lumshnong PHC, neiliang ka KSU Lumshnong Unit ha ka 23 tarik uni u bnai hapoh i yahkhmat u President, u Olenbat Pdang da lai ki wow takit yeiwa leh ki Nurse ha katai ka thaw sumaar ya kawi ka manbei kawa na ka chnong Chiehruphi kawa da wan wow kha khon ha katai ka PHC.
Katkam ka ujor da khana wa hei miet ka 21 tarik uni u bnai heipor kamwa 10:00 waje kawa man leh ka miet ka sngi Bibar, kawi ka manbei neidaw wa da toh por kha khon da lai ko cha katai ka PHC wei hadien wa dep pait ki Nurse da khana ki wa i por wow kha daw man i heipor 2:00 waje i step synyaaw wei da khana ki leh wa itai i khonboo da yap i wei kitai ki Nurse hadien wa da dep batai kamtai da lai thiah noh ki cha ki thaw sah ki.
Tangwa hadien 12:30 i pyrdi synyaaw, katai ka manbei da sooh khon ko wei kiwa ha-yung yong ka da Phone ki cha ki wow wan smat ki tangwa ymbien ki wow wan deiwa batai kamni kamtai wei wow e ya ka da ka um yow dih.
Tangwa da jia ha katai ka miet wa da emlang kawi ka men kawa em sap wow pynkha khon kawa man leh kawa chiyung shisem, ym yohsa ko wow pynkha yei khon neidaw wym wanpoi ki Nurse.
Manda poi 2:00 waje thij, ki Nurse da poi ki wei da chem wa dadep pynkha yei khon wei kitai ki Nurse da ong hi-eh ki ‘Ooh da dep dep pynkha mo,’ wei da lai biang ki cha ka thaw sah yow thiah.
Neiliang ka seiñ da sñiawphylla ko wa ki Nurse kiwa em Duty kammon won lai thiah ki itæ leh cha thaw sah ymtoh ha kamra ki Nurse kani ka PHC. Hei yong sakhiat toh u em ki ha ka thaw yang ki Nurse hawa emkaam i yarap wa jhan kamni.
Ka seiñ da ong ko wa ini i leh kini ki Nurse ha katai ka sngi lada ym em ka men wa tip u pynkha ym tip de boi wot ya ka manbei leh ye u poi chei wa sñiawsih.
Ka seiñ da kyntu ko leh ya kitai ki Nurse wym toh u leh stiñ ki hawa em kam kini ki kaam wa emkaam yarap jhan wei lada dang jia kam ini, ka seiñ daw leh ko yeiwa emkaam.
Hawa lai won ka seiñ cha kani ka thaw sumaar, da chem wa duna bha ki Staff Nurse wei em leh du uwi u u Doctor wei utai u Doctor ha katai ka miet wa jia ym em u neidaw wa lai chnong u.
Hawa kylli, u Doctor da khana u wa oo da toh i por wow lai pynpliah (Training), tangwa ym yoh u wow lai neidaw wym em kiwa wan yarap.
Kamtæ ka seiñ da dawa ko na ka sorkar wow pynbiang Nurse wa Doctor ha katai ka Hospital.
