U MLA ka Jowai, u Wailadmiki Shylla hawa kylli boddien yei long i man kiwa dang dooh thaw puræ, da pyntip u wa da dep phah ya u DC wow pynman ya ka yalang wa kiwa pynlai skur wa College wei da dep u leh wow yaklam wa u Montri ka chnat puræ puthi uwa da kular wow khut ya ka yalang heiwa da dep u leh wow yaklam wa u Director ka chnat puræ puthi.
Heiwa neiliang u Director da phah u ya u Joint Director wa hapoh 10 sngi wow chim yukheiñ heiyatoh wa ki skur ki College nadooh ki yong ka sorkar, ko yong ki bru samen kamjooh kiwa da yarap ka sorkar yow tip hadooh katwon wa dang lait thaw wei hadien ini daw pynbna iyi wa ye u leh.
Tangwa da kular u wow leh katwa ye yow pynpsiah hi ki ha ki skur, ki College hadien wa dep u leh yeini.
Neiliang Wailad da kyntu u leh ya kitu kiwa dang dooh thaw lai puræ hadooh kiwa da dep puræ leh wa em ki ITI wa ki Polytechnic hapoh ka District wei em leh i yarap naka sorkar hei dur ka Stipend wei ye ki wow thooh thaw lai puræ ha kitai ki thaw leh.
Kamtæ da pynchlur u wow kyruiñ cha kini ki thaw leh neidaw wa kini ki thaw yarap ki wow pynyoh kreh hadien wa dep puræ.
