Ka Regional Committee yong ka Jaiñtia Hills kawa da chna neibynta wow pynbait ya u pood wa ka Assam da pynsñiaw ko wa ya ka bui (Report) wa pura hajrong i pynbait ya u pood ha thaaiñ Ratacherra daw ekti cha u Montri Rangbah ka jylla, u Conrad Sangma ha namo chwa ka 15 tarik uni u bnai.
Hawa yaklam wa kiwa pathai khubor, u dkhot ka Regional Committee na Ri-loom Jaiñtia u Lahkmen Rymbui uwa man leh u Montri hapoh ka sorkar jylla da ong u wa ka Committee na Meghalaya wa Assam wa yatoh wa ka thaaiñ Ratacherra dadep yachem ko ha Shillong tangwa neidaw wa em kattu katni ki bynta ki wym sñiawthooh hajrong ki bynta yong ki thaw ha khappood kamtæ da paan por hadooh 15 tarik khnang wow yoh u lai lang da ki ar Committe cha kani ka thaaiñ.
“Chwa ka 15 tarik neiliang ka dhab na East Jaiñtia Hills wa Cachar District daw yachem ki wow lai pynbait lang neibynta wow pynbiang lut ya waroh iwa emkaam wei ha namo chwa ka 15 tarik uni u bnai neiliang kini ki ar Committee daw phah ki ya ka bui yong ki cha ki Montri Rangbah yong ki,” da ong u Lahkmen.
Chooh chooh da ong u wa ym em itæ i kylli wa mih wow chim næ e thaw markylliang (Give and Take), tangwa wow phiah ya ki thaw kiwa yatoh wa ki jylla, næ kiwa da pynbait nadooh nachwa da ki paaid ka Meghalaya wa Assam.
Ha iwi tawon i liang da ong u wa daw man ko ka sien wa nyngkong ha i parom ka jylla, wa ya i kaam pynbait pood da chimkhia wei pynlai da ki ar ngut ki Montri Rangbah, kitæ yong ka Meghalaya wa Assam wei wa kyrmen u wa ini i kaam pynbait pood daw man i iwa jop wei daw ye noh leh wow pynbait ya ki thaw wa kajia hapyrdi ki ar jylla.
Da ong u wa dap u dei kmen wa i kaam da lai i chaphrang wei da kyrmen skem u leh wa ini i kaam daw man i iwa jop wei chong i ha ka “Political Will’ namo i mon ha ka saiñ pyrthai ym kamwa man ha ki por wa ki snem kiwa da lai heiwa i kaam kut i du hei burom mar kylliang næ i ktien ‘Status Quo’ hapyrdi ki ar jylla, tangwa katni kani ka sorkar MDA ryngkat wa ka sorkar Assam da chimkhia ki da iwi i yumut wei itæ toh hajrong wow pyndep yeini hapoh i por wa da booh wow pyndep, wei da ngait skem u wa ki kattu katni ki thaw yakajia pood daw ye u pyndep noh.
