Hapoh 24 kynta dawa beh kreh ka TEA waka KSU ya ar ngut ki baar jylla wa pynchit ya ki pulit

Kiwa chong chnong ka Lumshnong kiwa man leh kiwa kreh ka Topcem Cement hapoh ka lama Topcem Employees Association (TEA), chirup waka Khasi Students’ Union (KSU) Narpuh Circle da dawa beh kreh ki ya ki ar ngut ki baar jylla kiwa da pynchit ya ki pulit wow dat ya kiwa yakhih ynnin heipor wa man ka Public Hearing.

Kini ki ar ngut man ki leh kam ki heh ka Topcem kiwa kynthup ya u Arun Kejriwal uwa man kam u AVP wa u Umesh Kumar, GM-Mines.

Kam wow pynkynmoo wa ki pulit ka East Jaiñtia Hills da siat ki ya ka Tear Gas wa i sympat lathi hadien wa mih i awri ha M/s Meghalaya Cement Ltd (Topcem) ha Thangskai.

Kiwa kreh ka Topcem waka KSU da ong ki wa kini ki ar ngut kiwa kreh da pynchit ki ya ki pulit wow dat u bom ya ki paidbah wa yakhih deiwa pynemkaam leh da ki ktien wa sih.