Ka Meghalaya High Court ynnin ka 20 tarik da chong bichaar biang ko ya ka mukotduma wa yatoh wa i tih mooyong pyrchah ya ka aiñ yow booddien yei pynkrehkaam ya ka hukum wa da pynmih ha ka 13 tarik uni u bnai yow wanrah 10 Company ki bru ka Central Industrial Security Force (CISF) yow pait yei kit mooyong pyrchah ya ka aiñ.
Neiliang u muktiar ka sorkar da ong u wa i pynkhreh wow leh yeini daw chimpor ko ym duna ya soo tayaw wei kini ki CISF toh u neh ki ym duna ya 2-3 snem chwa wa ka sorkar jylla u ye ko u pynbiang ya ki bru yong ka hi wow chimkti ya ini i kaam.
Kamtæ ka High Court da ong ko wa i jied ya kini ki bru toh iwa chimpor kamjooh i pynbiang thaw sah ya ki, tangwa da yooluti wa dei ryntih i rukom krehkaam ki bru ka CISF da yooluti wa hapoh 4 tayaw da ye ki wow em hapoh ka jylla.
Da pynkynmoo leh wa ini wa dep ka jylla da dep ko wow pyntip wa bien hi ko wow chna thaw sah yow wanrah ya ki bru ka CAPF, kamtæ toh u krehlang yow pynbiang thaw sah ya ki bru ka CISF wa kynthup ya ki Commandant wa ki bru yong ka. Da phah leh ya ka CISF wow jied bru ym du uwi wow pait ya ini i kaam wei hap ki wow yachem wa u Justice Katakey wa kiwa mihkhmat na ka sorkar yow jied yei thaw wow booh ya kini ki 10 tylli ki Company ka CISF.
Ha iwi won i liang, heiyatoh wow booh ya ki Weigh-Bridge hapoh ka jylla, da phah ya ka sorkar jylla wow pyntikna wa waroh ki 23 tylli ki Weigh Bridge wa toh u em hapoh ka jylla da krehkaam bha ki wei toh leh toh u booh ya kini ki Weigh Bridge ha ki thaw wa biang wei wow pynboon ki leh deiwa yaklam wa ki heh ka CISF hapoh i yahluti u Justice Katakey.
Ya kani ka mukotduma daw chong bichaar biang ha ka 12-04-23.
