U Speaker ka Meghalaya Legislative Assembly, u Thomas A Sangma deilang wa u Commissioner & Secretary, u Dr. Andrew Simons wa kiwi de ki sahep na ka Meghalaya Assembly Secretariat, ynnin da lai pait biang ki yei pynchna ya ka yung dorbar ka Meghalaya Legislative Assembly ha Mawdiangdiang. Wei da pynbood leh da ka yalang wa kiwa mihkhmat na ki chnat sorkar wa embynta ha ini i kreh.
Neiliang u Speaker da lai pait u leh ya ka Main Hall wei yei kreh wow pynyieñ biang ya ka tnoom kyllung iwa da lai chakhmat.
U Speaker da pyntip u wa da booh ya ki kyndon Standard Operating Procedure (SOP) wa hap wow bood yow pyntikna wa chngaiñ kiwa kreh kamjooh yow man ka tnoom kawa skem.
U Speaker da ong u leh wa kmen u yei lai i kreh chakhmat tangwa i kreh da slem i sa chi bnai deiwa pynrap wa emkaam wow pyndep noh hapoh chi bnai khlem da chimpor de.
“Ini yung da jan pyndep chna heiwa 90% ka liang timun wa liang tidiang, ka kamra krehkaam u Speaker, Chief Minister, Secretariat wa Library toh kiwa da jan pyndep. Ka bynta wa hapyrdi wa kynthup ya ka Main Hall toh kiwa dang sah,” da ong u Speaker.
Da khana u leh wa u Contractor wa u PMC da pyntikna ki wa yei tnoom daw pyndep hapoh 45 sngi wei kani man ko u moomær wa emkaam yow pyndep ya waroh kawi kani ka yung.
Discussion about this post