Hapoh chi bnai dawa khang ki le seiñ ya ki Check Gate ka tnat Forest

Shillong: Le tylli ki seiñbhalang wa kynthup ya ka Hynniewtrep Student Union (HSU), ka Khasi Jaintia National Union (KJNU) wa ka Chdooh Ri Jaintia wa Maya (CRJM) da e por ki chibnai ya ka sorkar wa toh u khang noh ya ki khyrdop pait chalan dieñ (Check Gate) ha Jaiñtia Hills wei lada ym leh ko ya ini, ki seiñ ym bahkhlieh ki lada mih iwon iwon i jia wa sniawsih.

Hawa yaklam ki wa kiwa pathai khubor ynne ka sngi, kiwa yahkhmat yong kini ka seiñ wa kynthup ya u President ka HSU, u Kyrshan Rymbai, u Wandahun Suchiang ka CRJM wa u Niman N Shadap ka KNJU da kam ki wa da chem ki yei sakhiat wa kiwa kreh ka tnat Forest wa ki karkhana wa ah dieñ wa emkti ki wow elaad wow chalan dieñ ha ka luti wa man pyrchah ya ka aiñ.

Katkam wa pynbaad kini ki seiñ da ong ki wa u Ranger ka Territorial Jowai, u C. Najiar da pynemkaam bakla u ya ka Transit Pass (TP) yong ka Evergreen Sawmill kawa em ha Khliehtyrshi, West Jaintia Hills wow e cha kawi ka ka karkhana wa seiñ be-aiñ kawa em ha Nartiang ha West Jaintia Hills.

Kini kiwa yahkhmat da ong ki wa hei yong sakhiat ki dieñ toh u em ki ha ki karkhana wa em ya ka TP tangwa da chem wa da thap ha ka karkhana be-aiñ kawa em ha Nartiang katwa ya ka TP won toh yong ka Evergreen Saw Mill.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da ong ki leh wa da dep chem ki yeini hadien wa yoh kem ki ya ka wi ka Truck wa kit dieñ be-aiñ na ka thaiñ Mawryngkneng.

Da booh ka kylli wa kammon ya ka TP ye u booh dieñ na kawi ka kharkhana cha kawi wei ini da suba wa da emkti leh ki hapyrdi kiwa kreh ka tnat Forest neibhah ya ka TP da e chwa wow thap ya ki dieñ heiwa toh u e hadien wa pynkit dieñ ha ka truck.

Hei jooh i por kini ki le seiñ da dawa ki leh naka sorkar wow pyndam noh ya ki 4 tylli ki Check Gate yong ka JHADC wa yong ka Sorkar kiwa em ha Ratacherra, Umkiang, Moodymmai wa Mowkaiaw deiwa pynbaad wa i em kini ki Check Gate ym em yumut ko iyi iyi leh neibhah ki pyllait bait ki ya ki trok deiwa chim poisa wei ym jooh pait ki ya ki kot ki sla.

Kini ki le seiñ leh da e por ki ki chi bnai wow khang noh ya ki khyrdop wei lada ym leh ya ini daw leh da ka PIL ha ka Meghalaya High Court.

Da ong ki leh wa da em hadooh chispah tam ki karkhana dieñ be-aiñ ha waroh kawi ka Ri-loom Jaiñtia wei ya kini ki dieñ na kini ki karkhana da chah chalan tooh cha Assam, Silchar wa cha kiwi ki thaw deiwa pynbam poisa da ki bru ka tnat Forest wa kiwa khayii.