Ka All Jaiñtia Muster Rolls Workers & Labour Union (AJMRW&LU) ynne ka 8 tarik da pynman ko ya ka Dorbar Yachemlang wa kyrpang ha Yungwalieh ka Dorbar Chnong Chiliangraij heiwa ki dkhot kani ka seiñ na kylleiñ ki chnong ka East wa West Jaiñtia Hills District da wan ki wow ya chimbynta.
Ya kani ka Dorbar ha kani ka sngi da phiah ha ki 2 bynta, heiwa ha ka bynta wa nyngkong da em ka yalang hei pynlai u Khroo Lamsalanki Pariat, President AJMW&LU wei da embyntalang leh u Lakhon Syngkon, Branch Manager, Jowai Cooperative Urban Bank wa u S Lapasam, Inspector Labour Department, West Jaiñtia Hills.
U Khroo Lamsalanki Pariat kam u chongknor yong kani ka Dorbar da kdar u wow e ki kyntien yahkhmat hajrong ka thong wa ye u pynman ya kani ka yachemlang wa nyngkong yong ka seiñ wei wow pdiang sñiawbha leh ya waroh ki dkhot kiwa da emlang ha kani ka sngi katwa u Lakhon Syngkon wa u S. Lapasam kam ki bru stat wa chemphang da chim ki wow klam u batai chaphang ki laad yarap wa ki rukom yoh myntoi kiwa ki bru kreh mylla namo ki Muster Roll ye ki u yoh lyngba ka Bank næ ka Labour Department kiwa man heidur yong ka ram næ kiwi ki jait yarap kiwa man neibynta ka yung ka sem wa ki khon ki kti yong ki.
Ka bynta wa ar yong ka Dorbar ha kani ka sngi toh i khana pynsñiaw yei krehkaam kyllum ka seiñ nadooh u snem 2018-2021 wa da pynsñiaw da ka Manda Bareh, General Secretary, AJMW&LU neitæ pynbood won i klam na ka President All Jaiñtia MDM Worker Union wa i klam na u President ka Jowai Polytechnic Workers Union.
Chooh chooh ha kani ka Dorbar ka seiñ deiwi i sur da chim ko leh ki rai wow pynkrehkaam ya ka Meghalaya Regular Casual Worker (RCW) Scheme 1996 katkam wa da rai ha ka 21 Kmaichonglad 2018 wa da yaklam wa ka sorkar.
Da rai wow pynkrehkaam ya ka Meghalaya Building and Other Construction Welfare Board wa kiwi kiwa da sahteiñ khamtam ha Education Scholarship, Death Benefit wa kiwi kiwi.
Ka seiñ da rai ko leh wow pynyinsur ya i rta wow chong-ngiah na ka 58 cha ka 65 snem wa ka bai baam tymmen, wow pyndooh ya i thung kreh sngi 59/89 ha Jowai Polytechnic wa ha Education Department kamjooh leh wow booddien ya ka nong kiwa kreh Mid Day Meal.
Ya kini ki mat waroh da e por wow pynkrehkaam hapoh ka 10 Kmaichonglad 2021.
