Jowai: Ynne u EAC (Election) ka West Jaiñtia Hills u BJ Kharshandi hei yaklam wa kiwa pathai khubor da ong u wa ki bor District hadien wa hukum u CEO ka Meghalaya wow pynpsiah pyrtuid ya kiwa ympu em u yoh u thap vote hapoh ka jylla kiwa da biang i rta, ka tnat hapoh WJH da thooh ko ki laad wow leh yeini waroh.
Da booh wow sdang noh da ka Special Drive namo wow pynpsiah pyrtuid ya ki khynroo khyllood kiwa da em 18 snem hadooh 21 snem wow ye ki u thap vote wei yeini u sdang nadooh ka 1 hadooh 31 tarik u Naiynñiaw.
Ha uni u Naiynru wa ha u bnai wow wan kani ka tnat sorkar daw pynman ko ya kiwa boon ki yalang nadooh ki seiñ saiñ hima, kiwa beh yaaw, kiwa kamai kari wa kiwi kiwi hei yatoh wa ini.
“Daw pynpsiah ya ki pyrtuid yong kiwa da dap 18 snem hadooh 21 snem i rta kiwa da mih pyrtuid katkam ka Census 2011 tangwa ympu em pyrtuid ki ha ka Electoral Roll” da ong u Kharshandi.
Hapoh kini ki 31 sngi daw yaleh katwa ye wow pynpsiah pyrtuid deiwa lai cha ki Higher Secondary School, ki College, ka ITI, Jowai Polytechnic wa kiwi kiwi.
U Kharshandi da pyntip u leh wa kiwa puræ chabaar leh ye ki u pynpsiah pyrtuid deiwa pyndap ya ka Online Registration na ka Website www.ceomeghalaya.nic.in
Heijooh i por da khana u wa da booh ya Phone No. 1950 yong kani ka Office heiwa ye u kylli takit ya iwon iwon wa emkaam hei yatoh wa ka EPIC weiwa hawa phone ha uni u number toh iwa mynkna.
Iwa rap phær toh wa kiwa khih mylla kiwa lai beh yaaw leh u yohlaad ki u pynpsiah pyrtuid neibhah wa daw pynman ki ya ka Special Enrollment namo ka pynpsiah pyrtuid kawa kyrpang heiwa daw em ki thaw wa ye ki u pynpsiah pyrtuid heiwa daw booh ya kiwa kreh kamjooh ya ki Form wa ye ki u pyndap. Da jied leh ya le tylli ki yaaw kiwa kynthup ya ka Iawmusiang, ka Yaaw Pynsiñ namo ka Yaaw Wahiajer wa ha Yaaw Muchai namo ka Yaaw Shangpung.
Also Read: Palat chi lak ngut u pynpsiah pyrtuid ka SEC ha u Naiynru
Discussion about this post