Ynne ka sngi ka Joint Action Committee-Namdong Area kawa kynthup ya ki Waheh Chbong wa ki seiñbhalang da lai yachem ko ya u DMHO ka West Jaiñtia Hills hajrong wa ki kaam wa yatoh wa ka Namdong PHC.
Neiliang ka Committee da dawa ko wow pyndap ya ki kyrdan kreh wa lait hapoh ka PHC wei wow pyndam ya ka hukum wow phah kreh ya kiwa kreh cha kiwi ki thaw neibhah wa neidaw wa leh kamni, u Doctor ka PHC da boonkaam u hadooh wa ymye u wow pdiang ya kiwa sah chah sumaar ha kani ka thaw.
Ka JAC da dawa ko wow pyndap ya ki 8 tylli ki phang wa duna ha kani ka PHC hapoh chi tayaw.
Kini ki 8 tylli ki phang dawa ka JAC toh wow booh MBBS Doctor sa uwi, ki Staff Nurse le ngut, ki Grade IV sa ar ngut, ka Post LD sa kawi, ka Ambulance, u Chowkidar sa uwi, wow chna pynmiat (Repair) ya u sarok cha PHC wei wow pynbiang ya i duna ha ki Sub-Centre Sanaro, Sub-Centre Namdong wa ka Saitsama Sub-Centre.
Ka JAC da pynsñiaw ko yei diaw hajrong wa phah ka chnat i chait i khiah kiwa da biang lut yow sumaar ya kiwa kjut tangwa kiwa sumaar won ym biang ki khamtam ha Namdong PHC, ka PHC kawa hap chakri ya ki 31,000 ngut ki paidbah wa ya ki 35 chnong wei sa i wym biang ki sarok kam cha Lapangap, Pdeintalo, Lumlakhiat wa kiwi ki chnong ki wym pu yoh sarok.
Chooh chooh da ong wa lada ym pynbiang yeiwa dawa hapoh chi tayaw neiliang ka JAC daw chim ko da kiwi ki rai wa khor.
