Hawa yaklam wa u Chairman ka JAF, u Shnalad Rymbai wa kiwa kitkaam ka JAF da klam che ki wa ka JHADC toh u pyndam ko ya ka NOC wa da e ki ya ka M/s. Unique Industry Coke Factory wow chna ya ka karkhana wa em ha Elaka Rymbai hapoh chi tayaw.
Da pyntip wa lada ka JHADC ym pyndam ko ya kani ka NOC, neiliang ka JAF daw yakhih ko ha ki soo chnong neibhah ini toh i kwah ki tre chnong.
U Chairman ka JAF da ong u leh wa ha kam kini ki por wymtoh u em iwon iwon i yakhih namo i mih paidbah tangwa neidaw wym mano ka sorkar tæ ki leh dei wym yohsa daw khut da ka yalang paidbah ha uni u bnai wa daw wan.
“Lada ka JHADC ym ye ko u pait u sylli ya i khyndaw ka rymaw ka Ri-loom Jaiñtia tæ dang miat wow khang noh ya ka Council neibhah da tip che wa ym chim ko ya i bor wa em ko wow yada ya ka rymaw,” da ong u Shnalad.
Da ong u leh wa da ki phaw tylli ki karkhana khyndaw-bilat wa ki karkhana Coke wa em hapoh ri-loom Jaiñtia wei du neini da che wa ka JHADC ym em myntoi ko na ki neibhah wot ka tulop ki wakreh leh dang sahteiñ bait.
