Ka mukotduma wa leh da ki wakreh ka JHADC pyrchah ya ka JHADC hi hajrong wym yoh tulop, da chong bichaar biang ya ka ynnin ka 9 tarik da u Justice W. Diengdoh ka Meghalaya High Court heiwa da ap, da sñiaw u yeiwa da wanrah da waroh ki liang khamtam wow pynlait noh ya ka poisa wa dang sah cha ka JHADC.
Neiliang ka yung bichaar neipor cheipor da pynmih ko ya ki sneiñ wow yahluti u pynbait ya iwon iwon wa sñiaw yaphær heiwa da dep wow chong yalang chisien ha ka 20-10-21 heiwa hadien kani ka yalang ka poisa (Royalty) wa toh u yoh neibynta u 2020-2021 lyngba ka Forest & Environment Department da poi ko T. 12,83,47,654 wa naka Transport Department T. 2,75,27,598 toh kiwa da pynbait wow su noh.
Heiyatoh wa ka bhah Royalty wa toh u yoh na ka Mining & Geology Department kawa da poi T. 48,18,11,649 heiwa kani leh toh ka wym pu em su. Neiliang u AG da pyntip u wa em ki kyndon wa hap wow bood wei chong leh hei em poisa wei ini waroh da chimpor wei da paan por leh na ka yung bichaar heiyatoh wa ini.
Katwa heiyatoh won waka poisa naka chnat Transport, neiliang u AG da pyntip u wa da pynlait ya ka poisa cha ka KHADC waka JHADC heiwa i bhah ka JHADC toh T. 2,75,27,598 wei da kulur u wa kani ka poisa daw phah noh ko hapoh chi tayaw nadooh ka 9 tarik.
Heiyatoh won wa kiwi ki bhah poisa wa dang sah, u AG da ong u wa daw booh noh dei por yow pyndep yeiwa emkaam heiwa ka yung bichaar da hun ko yeini kamtæ da phah wow leh wut wut wei wow wanrah ya ini hakhmat ka yung bichaar manda chong bichaar biang ha ka 15-12-21.
