Hapoh dorbar yatai ka JHADC hadien wa em ka kynthai wa yaleh Election Waheh Chnong

Ha ka Dorbar Tlang wa chi sngi ka JHADC kawa da man ynne ka sngi, u Awhai Andrew Shullai kam uwa yahkhmat ka Liang Pyrchah hawa chimbynta yatai u ya ka Motion wa wanrah da u MDC ka War Central, u Jamshaphrang Pohtam hajrong i emkaam u pynbha pynmiat chooh chooh ya ka aiñ “The Jaiñtia Hills Autonomous District Council (Establishment of Elaka and Village and Election, Appointment, Powers, Function and Jurisdiction of Dolloi, Sirdar, Waheh Shnong) Act, 2015, da kdaw u wa ya ka aiñ waheh chnong leh emkaam u pynbha pynmiat ya ka neibhah dang ini wa dep da em ka kynthai wa mih yakhun ya ka Election Waheh Chnong ha Sohmynting wei i daw toh wa ka aiñ ym em che ko.

Hajrong ini ong u wa neiliang u Dolloi leh ym em nood u wow khanglaad ya ka u yakhun Election toh neidaw wym thoh che ha ka aiñ.

Da pynkynmoo haroh u wa ya kani ka aiñ waheh chnong da chna jhan ya ka  ha u snem 2015 neidaw wa wan i chah tynjooh, wei ha katai ka por wa chna ym em thoh che wow khanglaad ya ki kynthai u yakhun Election neidaw wa artatien ya boi ym pdiang u Lat ka jylla Meghalaya ka.

Heijooh i por ong u ym em hi poi pyrkhat leh wow em ki kynthai wa nood u yakhun ya kani ka kaam.

Related posts

Iwa jia ha Lapangap toh nei lehbor ki Karbi dei kyrchaan ka KAAC wow yoh jylla thymme: CEM

November 20, 2025

Da thung ya u Acting Dolloi ka Elaka Labang Nongphyllut nadooh u 2023

November 20, 2025

Kamwa ya kani ka jooh ka mat da kylli da u MDC ka Amwi Khliehtyrshi, u Madonbai Rymbai ha ka kynta kylli yukylli, yeiwa u CEM jubab u wa lada jop ko leh ym ye u pdiang neibhah ha ka Sanad da thoh ya ka kyntien “U”.

Hajrong ini i jubab u CEM, u Andrew Shullai da e yumut u wa ka kyntien “U” ha ka aiñ ym krehkaam ko lada jia wa kani ka kynthai lai ujor ko chaka yung bichaar, na itæ i daw ong u emkaam u pynbha ya ka aiñ.

U Jamshaphrang Pohtam won hawa e yumut da kdaw u ya ki bynta wa dang emkaam u pynbha pynmiat wei pynpsiah ya ki kyntien hapoh kani ka aiñ khnang yow khlan bor chooh chooh ko.

Kamtæ hadien wa neiliang u CEM da pdiang u yei e yumut wei da kular u leh wow ya pait bniah biang ya kani ka aiñ, neiliang u Jamshaphrang Pohtam leh da pyndam u ya kani ka Motion.

Puræ leh: I e khublei sñiawngooh na ka Planky Pyrtuh kawa yakhun Election Waheh Chnong ha Sohmynting