Jowai: Ka District Legal Service Authority (DLSA), West Jaiñtia Hills District, Jowai chirup wa ka Jowai Traffic Police ynne da pynkhooid ki ya ka Iawmusiang, Jowai. Chwa wow sdang ka pynkhooid da em ka yalang wa tbian ha Ummulong Taxi Stand, Iawmusiang, Jowai kawa da pynlai da u D.S. Marbaning, Secretary District Legal Service Authority, Jowai heiwa da pyntip u wa kani ka pynkhooid toh wow pynsñiawthooh paidbah yei kordor i khooid i jngiar.
Kiwi kiwa da e klam ha kani ka sngi toh u SP ka West Jaiñtia Hills, u Vivek Syiem, u District & Session Judge cum Chairman of District Legal Service Authority, E.Kharumnuid, u Officer in-charge Jowai Traffic, D. Pde, Principal North Liberty Higher Secondary School, u Richard Uriah, u Lecturer ka Thomas Jones Synnod College W. Lamin wa u kyrtong MDC ka Jowai Central, u T. Hinge.
Kiwa da e i klam da pynksan ki yei emkaam wow pynkhooid ya ka Jowai khamtam ka Iawmusiang wei wow yait nei noh jhep ha tymbud sarok.
Da kyntu ki leh ya waroh kiwa embynta wow em ki i bahkhlieh wow pynkhooid ya ka yung ka sem kamjooh leh wow mih cha lait wow embynta ha i lehkhooid.
Heijooh i por da kyntu leh wow dam u pynemkaam ya ki plastic neibhah wa ktah joor ki ya ki um ki wah wa kiwa im ha ki.
Ynne ka sngi neiliang ka Jowai Traffic Police da wah ki ya ki tin noh-jhep ha kiwa boon ki thaw.
Ha kani ka pynkhooid da embynta ki khynnah ka Thomas Jones Synnod College, Jowai, Kiang Nangbah Government College, North Liberty Higher Secondary School, Jowai, kiwa chongdai wa kiwi kiwi.
Discussion about this post