Ka Mukotduma PIL wa da yaleh da u Kynjaimon Amse ha ka Meghalaya High Court pyrchah ya ka National Highways Authority of India (NHAI) heiyatoh wa u sarok NH-6 nadooh na Jowai Bypass chadooh cha Malidor, da chong bichaar biang ka ynne ka sngi.
Neiliang ka NHAI da pyntip ko wa u Regional Officer yong ka uwa em ha Guwahati da dep lai hiar u dei bru ha ka 16 tarik uni u bnai yow chem dei khmat yei long i man uni u sarok.
Da pyntip leh wa ha ka 19 tarik da phah ya uwi na ki Contractor wa u Project Director ka NHAI wow leh yeiwa emkaam ya katni chooh yow ye tang u lai chwa lyngba uni u sarok khamtam ki bynta ka Khliehriat wa hajan ka Sonapyrdi Tunnel.
Kamtæ ka High Court da phah ko wa kini ki bynta kiwa emkaam bha kiwa da ieh khlem da pynchna wei da chem leh da ka yung bichaar yei sih ki toh u pynchna hapoh ka 15 tarik u Naichiphaw, 2023 wei i chna won ya waroh uwi u sarok yow hoi tang u lai toh u pyndep chwa ka 15-11-23 wei da yooluti leh wa da em ka poisa wow leh yeini i kreh kamwa lai thma man-ka-sngi.
Chooh chooh ka yung bichaar da ong ko wa ym em kwah ko wow puræ ya ki chithi wa da yathoh hapyrdi ki sahep ka NHAI kamjooh iwa da phah cha ki Contractor neibhah iwa emkaam toh u sdang yei kreh yow ye chwa tang u lai ki kari wei hadien itæ chna pynchkeh won ka leh hoi hi.
Yow pyntikna yeini, da phah ya ka NHAI wow khana kammon da lai i kaam ha ka tayaaw wow wan katwa ka sorkar jylla won lyngba u DC ka East Jaiñtia Hills District toh u phah ki leh ya ka Report katwon da chna ya u sarok hapoh Khliehriat chadooh Lumshnong.
Discussion about this post