Heiyatoh waka mukotduma PIL wa da yaleh da uwi u muktiar na Dkhiah West, East Jaiñtia Hills District, u Kerlang Ksoo hajrong wym pynchna ka sorkar ya u sarok NH-6 wa kynthup ya ki bynta ka Shillong-Jowai, da chong bichaar biang ya ka ynne ka sngi da ka Meghalaya High Court hadien wa da e por ya ka sorkar wow jubab ko.
Neiliang ka sorkar jylla da jubab ko deiwa ong wa hanla ym em pynlait poisa da kawa dap da ka sorkar pyrdi, ka sorkar jylla da lai ko chakhmat yow pynchna ya u sarok Shillong-Jowai uwa man man leh chibynta u sarok NH-6 yow pyntikna wa lai bait i lai i wan ki bru khlem thut.
Chooh chooh ka sorkar da ong ko wa da dep wow pynchna chiboon iwa da sih wei ya kiwa dang sah daw pyndep hapoh ka 20-12-21 tangwa neiliang uwa yaleh mukotduma da ong wa em ki thaw wa pynchna sarok ym toh deiwa miat wei ym neh slem i.
Ka NHAI leh toh kawa da emlang ha kani ka mukotduma, kamtæ ka yung bichaar da phah ko ya ka NHAI deilang waka sorkar jylla wow pyntikna wa ini i kreh wow pynchna katni toh kiwa daw soi wei kiwa daw neh slem yow lait u thut i lai i wan ki kari.
Da phah leh ya ka sorkar jylla wow e ya ka bui (Report) deilang wa ki dur wei waroh ar (NHAI waka sorkar jylla) toh u pynkhreh ki yei rukom kreh yow pynneh yei miat i bha u sarok NHAI.
Ya kani ka PIL daw chong bichaar biang ha ka 04-02-22.
Puræ leh: Yaleh PIL uwi wym chna pynmiat ka sorkar ya u sarok Shillong-Jowai
