Ka sorkar Meghalaya ha ka kyrwoh wa da phah, da pyntip ko wa da chimkhia ko wow leh yeiwa emkaam pyrchah ya ki karkhana Coke wa krehkaam pyrchah ya ka aiñ kam chibynta leh wow bood ya ka hukum ka High Court ka Meghalaya.
Da pyntip wa da dep wow khang ya waroh ki karkhana Coke wa krehkaam pyrchah ya ka aiñ ha u Kmaichonglad (Dec) 2022 wei da pynsih leh ya ki tyndur chet mooyong yow pyntikna wym ye ki wow krehkaam biang.
Chooh chooh da ong wa hadooh u Naitung (April) 2023 da ye wow pynduna bha ya kini ki karkhana wa krehkaam pyrchah ya ka aiñ.
Kamtæ da ong wa ka sorkar da pynkrehkaam chooh chooh ko ya iwa phah ka High Court heiwa da lai tympdung ya ki toskhana kamjooh da tympra ya waroh iwa em ha kini ki karkhana wa krehkaam pyrchah ya ka aiñ wei wow kem leh ya kiwa pynkrehkaam pyrchah ya ka aiñ.
I lai tympdung ya ki toskhana kamjooh wow tympra ya kiwi ki bynta kini ki karkhana da sdang nadooh ka 8 tarik uni u bnai wei hadooh ka 10 tarik da dep tympdung 3 tylli ki toskhana wei da booh hadooh ka 20 tarik uni u bnai yow pyndep yeini waroh.
Da pyntip leh wa kitu kiwa da tipmit wa emkti wow leh ya kini ki kaam pyrchah ya ka aiñ da em ki boon ngut wei da kem leh ya ki.
Hajrong ini da ong wa ini wa da leh ka sorkar pynyoo wym em chong klitkti hi-eh ko heiyatoh wa ini i kaam wei ymtoh kamwa da sñiawthooh bakla wym em leh iyi iyi.
Ka sorkar da ong ko wa yieñ skem ko wow pynkrehkaam ya ka aiñ kamjooh wow yada ya ka soodong sookun kiwa chong chnong wei i pyndooh ya kini ki karkhana Coke wa pyrchah aiñ man ko kam chibynta wow pynkhai im biang ya ka bei rym-aw.
Kamtæ ka sorkar da kyntu ko ya waroh kiwa chong chnong wow krehlang wa ka sorkar hawa pyndep ki bor District yei kaam yong ki.
Puræ leh: Da u Bomb chah tympdung ka karkhana Coke
