Hadien wa poor iwi i dur ha ki Social Media wa em wa yoh u chondur ya ka kor EVM hachwa wow thap Vote iwa man pyrchah ya ka aiñ wot hadien wa da dep pynbna wa da khang wow rah Mobile Phone hapoh ki thaw thap Vote.
Neiliang u Chief Electoral Officer ka Meghalaya, u FR Kharkongor da ong u wa ha waroh hi ki thaw thap Vote da bood ya kani ka kyndon da kiwa thap Vote kamjooh da kiwa kreh Election tangwa da em wa yohlaad wow leh pyrchah yeini ha Ri-Bhoi District ha 35-Shiliang Umdoh Polling Station wa haap hapoh ka 8-Mawhati Assembly Constituency.
Kamtæ da pyntip cha u District Election Officer ka Ri-Bhoi wa hadien wa pynman ya ka takit wei da chem leh yei thaw wa jia ini, da phah wow pynchitom ya uwa thap Vote wa da leh pyrchah yeini.
Da phah leh wow e ya ka bui (Report) chwa ka 3 tarik khlem pep.
