Ynne ka sngi ha ka yalang pynkup burom ya u Montri Rangbah ka jylla u Conrad Sangma wa da pynman ha Khliehriat West da kiwa khih mooyong ka East Jaiñtia Hills, neiliang u Symbood Montri Rangbah ka jylla, u Sniawbhalang Dhar hawa e yei klam da ong u wa ka sorkar da yaleh ko wow wanrah biang yei tih mooyong nadooh u snem 2018.
Da ong u wa hanla da yoh yei bor wow tih mooyong biang tangwa dang em chiboon i eh i khor wei emkaam wow yakrehlang wa ki bor District.
Heiyatoh wa kiwa tih mooyong kiwa khian da ong u wa daw yaklam wa ka sorkar pyrdi wow pynkhian ya i thaw tih moo wei kyrmen u wa hapoh san snem ym duna 50 tylli ki Mining Lease wa daw yoh.
Chooh chooh da ong u wa i khang tih mooyong ym ktah i du ya kiwa mahajon tangwa khamtam kiwa khih mylla.
Heijooh i por da ong u wa ka liang pyrchah da ong ko wa ka sorkar tang wow yoh chuki da kular ko boon jait tangwa ki won kam kiwa mihkhmat kjut i mynsien ki wow yoo yeiwa chem chitom ki paidbah.
Da kyntu u leh ya ki paidbah wow yaichah neibhah daw em chooh wow yoh Mining Lease ha ki por wow wan.
Da ong u leh wa lada em kiwa chem chitom hawa pyndap ya ki kot ki sla wow wan ki chaphrang neibhah kam kiwa mihkhmat toh i kaamram wow kreh ya ki paidbah ymtoh wow chong donhi ha Secretariat.
