U symbood montri rangbah ka jylla uwa pait leh ya ka chnat Transport, u Sniawbhalang Dhar ynne da pyntip u wa i kreh wow pynheh ya ka Shillong Airport u sdang noh i khnang wow ye ki lieñsuiñ wa heh u hiar ha u snem wow wan.
Da ong u wa ka Airport Authority of India (AAI) da khut ko ya ka Tender wow pynheh noh ya kani ka Airport wei ngait skem u wa hapoh u 2026 daw ye noh u pyndep yei kreh.
Heiyatoh wa i thaw, da ong u wa ya i thaw dadep thied lut wei sah sadu wow su ya ka bai thaw.
Da ong u wa ka AAI da khut Tender ko ha ka 5 tarik uni u bnai neibynta wow pynheh ya ka Shillong Airport wei ini da man iwa jop nei ye u montri rangbah, u Conrad K Sangma wow booddien ya ini i kaam.
I pynheh ya kani ka Airport kynthup ki ya u sarok namo u Runway wa 571-metre khnang wow jrong u hadooh 2,400 metre wei heitæ u ye ki lieñsuiñ wa heh kam ka A-320 u hiar ha Shillong.
Chooh chooh i kreh kynthup i ya i pynheh ya ka Terminal Building wa kiwi heiwa ka Tender man ko Rs 11,944.47 lak (Rs 119.44 klur), wei u pyndep yei kreh hapoh 18 bnai.
Ha u Naisaphra 2024 ka AAI da e ko ya ka Master Plan wow pynheh ya ka Shillong Airport heiwa daw emkaam ya i thaw wa heh sa 22 acre.
Kam wow kdaw heini, u Conrad da booddien u yei pynheh ya kani ka Shillong Airport wa ka sorkar pyrdi ha ki kyrdan waphær waphær wei manda dep i kreh daw ye u pynyabi ya ka wa kiwi ki bynta ka ri.
Discussion about this post