Ka Jaiñtia Hills Autonomous District Council (JHADC) haka dorbar kyrpang wa da pynman ko ynne ka sngi, da wanrah ko yaka Bill wa tip kam ka “The Jaiñtia Hills Autonomous District (Village and Town Development Council) Bill 2023”, neibynta u pynman aiñ yei e bor pynkrehkaam yaki Scheme pynroi waphær waphær ka sorkar pyrdi ha ki chnong ki thaw lyngba ka District Council.
Ya kani ka Bill da wanrah da u CEM, u Thombor Shiwat uwa da khana leh hajrong i emkaam wow em yaka Village wa Town Development Council neibynta u ye u pynpoi bait yaki Scheme pynroi cha ki chnong ki thaw deiwa emkaam u thung ya u Chairman, Vice Chairman, Secretary, Asst. Secretary, Treasurer deilang ki dkhot yow pynlai bait yaki Scheme ha jar jiar ki chnong.
“I kwah ka sorkar pyrdi hi toh daka Village Council tangwa neidaw wa i da em chwa i ka aiñ heiyatoh i bor yong ki waheh chnong wa ki Dolloi, kamtæ da e pyrtuid noh i da ka Village wa Town Development Council ka wow krehkaam du neibynta ki Scheme wa wan naka sorkar pyrdi cha ki chnong ki thaw,” da ong u CEM.
Haka kynta pynyoo pynsñiaw yumut, ki MDC ka liang pyrchah wa kynthup ya u Awhai Andrew Shullai, u Lakhon Biam wa u Brightstar Chyrmang da kdaw ki boon i duna wa em ha kani ka Bill kiwa emkaam u pynbait khnang yow lait u wanrah kulmar ko hadien habood.
Ka nongmuna wa kdaw ki kynthup i rta wa ye u man dkhot hapoh kani ka Bill iwa 25 snem wei toh u man ki man u kam ki tre chnong wa da sah palat 12 snem ha i jooh i chnong wei u waheh chnong toh u man u kam u Chairman, tangwa haka aiñ waheh chnong won kdaw ko wa du 5 snem i man tre chnong pura leh da ye u yakhun waheh chnong.
Ong ki ini pynyoo wa ka aiñ wa chna pyn da ka Council hi leh da pynkulmar ko neibhah haka Development Council Bill u waheh chnong wym ye lait rood nei man Chairman wei toh u man u kam uwa chong chong pura wa palat 12 snem, katwa kamtæ yi won u jia ya uwa yoh man waheh chnong dang ha ki palat 5 snem i man kam uwa chong chnong.
Neiliang u CEM wa kiwi ki dkhot ka Excutive Committee hawa pynche ong ki ya kani ka Bill da pynkhreh smat heipor wa tbian lyngba i hukum naka sorkar pyrdi, kamtæ da pdiang ki yei duna wa pynyoo pynkdaw ka liang pyrchah wei kular u leh wow pynbait chwa u phah cha u Lat ka jylla yow yoh i mynjur.
Heijooh i por u Andrew Shullai da kyrpaad u leh yaka Executive Committee u pynpoi lang ko cha waroh ki dkhot ka yung dorbar hadien wa dep pynkylla ki yei duna ha kani ka Bill khnang yow che yow tip lang.
