Jowai : Ynne ka miet da man ko ka miet heiwa da yoh u sakhi ya ki hajar ngut ki paidbah kiwa da mih wow yang ya ka Sngikha u Jisu u Nongpynim ya kawa da tip ka Khristmas.
Yeini da yoh u sakhi ha ki soo tylli ki yungmane ki Balang Presbyterian ha chnong Jowai kitæ kynthup ki ya ka Balang Presbyterian Jowai, Balang Thadlaboh, Balang Khimusniang wa ka Balang Mynthong.
Ki manbei manpa kiwa da yah wa ki khon ki kti, ki khynroo khyllood wa ki lok ki jor da yamih ki wow yang ya katæ ka por wa kyntang wow em ka ‘Midnight Service.’
Ha ka Balang Jowai ha madan Mission Compound da yoh u sakhi ya kiwa ya rwai pyllah, ki rwai na ki khon ka Balang katwa dang hang ki yei diñ iwa kyrooh bha.
Hapoh ka Balang Khimmusniang da sakhi ya ki dhab tem, ki nongrwai khynnah wa ki khon ka balang kiwa chaad yow pdiang ya ka Christmas.
Ha Balang Mynthong da sakhi yeini ha pchem ka District Library Auditorium, Jowai heiwa da yoh ya ki rwai na ki dhab tem ka balang, wa na ki khon ka Balang.
Katwa ha Balang Ladthadlaboh da sakhi yeini heiwa da sakhi yei chad wa ki rwai na ki khon ka balang.
Discussion about this post