Shillong: Ka jylla ynne ka sngi hapyrdi i joo umkhmat kthang da leh warom khaddooh ko ya u Lamphang ka yung dorbar Meghalaya uwa jooh man leh u montri rangbah warim wei heijooh i por u President ka United Democratic Party, u Dr. Donkupar Roy uwa da khlaad noh na i chitom ha ka 28 tarik mynta uni u bnai ha ka thaw sumaar ka Medanta Hospital, Delhi.
Ya u Dr. Donkupar da leh warom khaddooh ha ka yung sah yong oo kawa em ha ka Sohra da ka Party UDP, kiwa ha yung ha sem wa ka Balang, wei da pynbood won sa ka leh warom da ka sorkar jylla næ ka State Funeral ha madan Mawpun, Sohra ha chwa wow rah yei metyap cha Shella kawa man ka chnong wa da kha ya oo wei kawa man leh ka Constituency wa da mihkhmat hadooh 7 sien.
Hawa klam ha ka yalang, neiliang u Working President ka UDP, uwa man leh u MLA ka Mairang wa u Montri ha ka sorkar, u Metbah Lyngdoh da ong u wa i dooh ya u Dr. Don ym toh du ya ka yung ka sem næ ka jylla, da chah ieh khonswet leh ka Party UDP.
Da kynmoo u leh ya iwa klam yong uni uwa yakhmat wa ka juk yong ka chet kylla da kut ko, wei man u leh uwi na kiwa yahkhmat skem ka yurim wei uwa em ka mynsien kreh chitom.
Ha ka yalang leh warom ha yung sah, da yoh ya i klam na kiwa yahkhmat ka UDP wa na u diah khaddooh wei da pynbood sa ka yaseiñ duwai da ka Balang Presbyterian, Jaiaw wa da yahkhmat da u Pastor Rev. W.C. Khongwir.
Hadien i leh warom da ka yung ka sem wa ka UDP ha yung sah, ya ka met yong u Dr. Donkupar Roy da e kti noh cha ka sorkar jylla yow pyndep ya ka leh warom wa khaddooh ha madan Mawpun, ha i pyrdi i pynthut u slap, tangwa da ki hajar ngut ki paidbah na kylleiñ da poi ki.
Ha kani leh warom wa khaddooh ya u Lamphang da ka sorkar da emlang leh waroh ki MLA ka jylla wa kynthup ya kiwa em ha ka sorkar wa na ka liang pyrchah, ki sahep sorkar nadooh u Chief Secretary, u DGP, ki MDC nalor kiwa ha yung ha sem wa kiwi kiwa leh warom khaddooh ya uni uwa yahkhmat ka jylla.
Rap hadien da synran lang ya ka met yong u Dr. Donkupar Roy da u Montri Rangbah. ki montri deilang wa ki MLA wa kiwa ha yung hasem wow lai tlep emburom ha ka chnong Jatap kawa em ha Shella.
Discussion about this post