Shillong: Ki paidbah wa sah ha Harijan Colony, Them Iewmawlong ynne ka sngi da mih ki wow pyrchah yei thmu ka sorkar lyngba ka High Level Committee (HLC) wow kyrriah noh ya ki na kani ka thaw. Kini ki bru wa sah ha Harijan Colony da pynsñiaw ki yei pyrchah heipor wa pynman sorjamin (Survey) lang ki tnat sorkar kam ka Directorate of Land Records and Survey, ka Shillong Municipal Board (SMB) wa ka Hima Mylliem.
I sorjamin ya kani ka thaw da sdang ko ynne ka sngi hapyrdi i sonteri wa joor da ki pulit wa ki CRPF khnang wow lait u em iwon iwon i pynthut.
Heipor wa poi ki sahep ka SMB wa ka Land Records & Survey, ryngkat wa ki montri ka Hima Mylliem, da mih ki kynthai na kani ka thaw ryngkat wa ki kot rben wa thoh ya ki kyntien wow pyrchah yei thmu ka sorkar jylla wow kyrriah ya ki na kani ka thaw, tangwa i mih yong ki ym em wanrah i yei thut wow pyndep ya i sorjamin neibhah wa da sonteri bha ya kani ka thaw da ki magistrate wa ki pulit.
Ya ini i sorjamin da leh katkam wa phah da ka High Level Committee (HLC) wa da thung da ka sorkar kawa da epor wow pyndep yeini hapoh 10 sngi chwa wow e ya ka bui (Report) cha ka HLC.
Neiliang ka Director ka tnat Land Records & Survey, ka I. Mawlong da ong ko wa ini i sorjamin daw neh i kamwa ar le sngi wei hadien wa yoh ya ka yukheiñ chirup wa ka map yong ki thaw daw e won cha ka Shillong Municipal Board (SMB) wa ka Hima Mylliem wei neitæ won daw e ya ka bui cha ka HLC.
Discussion about this post