Ki ASHA namo ki Accredited Social Health Worker man ki ki bru ka chnat i chait i khiah wa haphrang dooh kiwa yatoh wa ki paidbah ha ki chnong ki thaw wei khamtam kam ha kini ki por wa em ka khlam COVID-19 hanla i yoh yong ki man i iwa kajak, kattæ leh kreh ki ya ki kaam yong ki sngi wa miet tangwa ha kani ka kynti kini ki ASHA hapoh ka lama yong ka seiñ Meghalaya Asha Workers Union (MAWU) da sdang ki yei yakhih sangeh krehkaam wa khlem booh por nadooh ka 19 tarik uni u bnai.
I daw wa sangeh kreh ki ASHA ha waroh kawi ka jylla toh wa ka sorkar ym mano ko ya i dawa yong ki hanla ka nong wa da su cha ki man ko kawa khian bha wei wa dang sah ka poisa wa toh u su cha ki kam ka Asha Benefit Scheme (ABS) wa ka Maternal Maternity Basic Scheme (MMBS).
Hawa yaklam wa ka President ka Jowai Unit yong ka MAWU ka Fionaliza Timung da ong ko wa ya ini i yakhih ymye de ki wow sangeh kat wympu pynche ka sorkar heiyatoh wa ka ABS wa MMBS wa sah kamtæ da sdang ya ka yakhih sangeh krehkaam wei ha ka 21 tarik ka sorkar da thoh ko wow pynlait noh ya ka wei neiliang yong ki da dawa ki wow yoh noh da ka tulop wei ymye ki wow im na i su Incentive ka sorkar kawa du T. 1,500-T. 1,600 khamtam wa haap kreh ki kamwa 24 kynta wei ym im de ki dei kreh monsñiawbha.
Da pyntip ko wa ynne da yachem ki wa u MP ka Shillong, u Vincent H Pala uwa da e mynsien ya ki wei da kular u leh wow thoh cha ka sorkar heiyatoh wa i eh i khoo wa yachem ki.
Chooh chooh da ong ko wa ka seiñ da dawa ko wa kat wympu kular ko dei thoh wow su da ka tulop ymye ki wow sdang kreh ki wei katkam wa man katni da sangeh ki waroh i jait kreh yong ki nadooh i pynkhreh ya ki bui (Report), wow booddien wa kiwi kiwi wei lada leh ki yeiwa phah ka sorkar ya ki wow leh ya ki kaam, daw pynyoo wa ki leh im ki neini i rukom su ka sorkar ya ki.
Ka Fionaliza da ong ko leh wa ha u snem 2018 da em i yakhih chah thngan ki ha Secretariat Shillong heiyatoh wa ka ABS wa ka MMBS wei hadien itæ da khut u montri rangbah ya ki wow kular u pynlait 50% ya kawa sah wei manda kheiñ yeiwa da su da man ko du 40% donhi hanla da sdang lai kreh biang ki wei ha kani ka kynti da hap yakhih biang ki neidaw wym mano ka sorkar wow su cha ki wei ha ka 21 tarik da kular ko wow su tangwa khlem iwon iwon i dak wow pyntikna yeitæ.
Da ong ko wa nadooh wa sdang ki u yakhih ym em de u kreh ki hanla dang poor u khñiang khlam COVID-19.
Heijooh i por da ong ko wa ki ASHA cha kiwi ki jylla yoh ki da ka tulop heiwa da sdang ki u yoh T. 8,000 chi bnai katwa ha jylla won dang e dang du da ka Incentive donhi wei da pyntam sa T. 1,000 neidaw wa em ka khlam COVID-19 wei ini leh man i iwa ymdap neibhah wa ki yung leh da boon ki wei i kaam yong ki leh da man i iwa khia bha.
