Hapyrdi ka la-ær wa joor phooh ka lehkmen Chaad Sukra ka Mukhla

Jowai : Ka Seiñraij Mukhla ynne ka sngi da pynman ko ya ka Chaad Sukra kawa kyrpang yong ka ha Madan Eiadaw, Mukhla.

Hachwa wow sdang ka lehkmen da em ka yalang wa tbian heiwa u EMH Passah da man u kam u Kongsan hei emlang ki waheh wasian chirup wa ki khon ka Raij wei da pyllai ya ka da u President ka Seiñraij Mukhla u Welborn Lyngdoh.

Ya ki kyntien ngoohblai da yoh na u Ryngkatlang Sari, i klam na u Langdoh ka Raij u Wanbha Langdoh uwa da khana wa kani toh ka sien wa ar wa pynman lang chirup ya ka Chaad Sukra heiwa da embynta waroh ki 5 tylli ki chnong hapoh ka Raij wei manda dep ynne ka sngi daw pyndep won ki ya ka ha jar jiar ki Chnong kamwa jooh leh khlieh snem. Ka sien wa nyngkong toh ha u snem 2012.

Da yoh leh i klam na u D. Lamar uwa da batai wa ka Chaad Sukra man ko ka chaad wow pynemwarom ya ka Syiem Rymaw, ka lehkmen heiwow yoh yei doh i pran wa chait wa khiah.

Ha ka sngi pynkut ya ka Shad Nongkrem wan e kti u Lat ya ka aiñ Hima Khyrim Act, 2024

November 12, 2024

Da pynthymme ya kiwa kitkaam ka Khyrdoh Kur Passah

November 11, 2024

‘Ka pyrthai dang ha ki snem 1970 tipmit ko ya ka Rymaw kawa tip kam ka Earth Day tangwa i ki Pnar da slem tipmit wei burom i ka’ da ong u Lamar.

Kam u kongsan ha kani ka sngi u EMH Passah hei klam yong oo da ong u wa ka Chaad Sukra man ko kawa kyntang kawa kyrpang heiwa yoh i u yachem u emlang chirup kam chipayu.

Da khana u leh wa ha Jowai em ka Baamphalar kawa man kam ka Chaad Sukra ha jar jiar ki chnong kamwa man ki chnong hapoh ka Raij Mukhla wei da pynman leh ya ka Chaad Sukra yong ka Raij kamwa man ynne ka sngi.

Da kyntu u wow man ki khon ka Niamtre kiwa yatylli la heiwon kawon ka chnong, ka Raij, ka Elaka wa kiwi kiwi.

Da pynkut ya ka yalang da ki kyntien e khublei na ka Secretary ka Seiñ Manbei ka Mital Suna.

Da pynphooh ya kani ka Chaad Sukra da ki chaad wa ha rukom kam ka Chaad Rwai, ki Chaad Pliang, Chaad Kylleiń-kti, Chaad Kylla Pliang wa kiwi kiwi.