Ynne ka sngi, ka seiñ Jaiñtia Students’ Movement (JSM) hapyrdi u slap da pynman ko ya i yakhih chong kyllaiñ myngngor haphrang ka thaw psiah cha ka yung krehkaam u Deputy Commissioner, Jowai hajrong i wymye ka sorkar wow kyrriah ya ka Entry Tax Gate ha Khanduli.
Ya kani ka Tax Gate da pynyieñ da ka Karbi Anglong Autonomous Council (KAAC) wow khrong dan na ki kari ya kawa da booh ha chnong Khanduli kawa man ka chnong kawa em hapoh ka jylla Meghalaya.
Ka seiñ da sdang ko ya i yakhih hajrong ini i kaam ynnin i step ha JHADC chwa wow sdang dorbar ka Council.
Hawa yaklam wa u President ka JSM-West Jaiñtia Region, u Ribok N Biam da ong u wa i yakhih ynne toh wow dawa kyrriah ya kani ka Tax Gate yong ka KAAC na ka chnong Khanduli.
Chooh chooh da ong u wa hadooh kattæ ym pu em u khut ki bor sorkar wow yaklam wa ki heiyatoh wa ini i kaam deiwa pynrap leh wa lada ymye wow kyrriah ya kani ka Tax Gate i yakhih ka seiñ daw pteiñ i ha ki sngi wow wan.
Puræ leh: Yakhih ka JSM haphrang ka JHADC yei wym klam hajrong ka Tax Gate ha Khanduli
