Ka lympung yalehke District Level Inter School Athletic Meet 2022 kawa le sngi da sdang ko ynne ha Teilang Playground, Dkhiah West, East Jaiñtia Hills District heiwa u Abhilash Baranwal, Deputy Commissioner da man u kam u kongsan hei emlang ka Stephanie M. Rapsang, District Sports Officer, u Coming One Joy Tlang, General Secretary, East Jaintia District Sports Association wa kiwi kiwi.
Ya kani ka lympung da pynman da ka yung krehkaam ka District Sports Officer, East Jaiñtia Hills District chirup wa ka East Jaiñtia District Sports Association (EJDSA) wei da pynman ya ka kam chibynta yong i dap 75 snem ka ri wa 50 snem ka jylla.
U Abhilash Baranwal da yaroh u ya ki khynnah na ki skur waphær waphær kiwa da wan chimbynta ha kani ka lympung wot hapyrdi u slap wa joor. Da ong u leh wa ka Sports daw yarap bha ko ya ki khynnah heiyatoh wa i akor, i yaichah, i yohmynsien, khnang wow ye ki u yakhun la ha kiwon kiwon ki bynta.
Ha uni u snem da em 23 tylli ki skur wa chimbynta ha ki yalehke wa kynthup ya ka 60 metre, 100 metre, 200 metre, 300 metre, 400 metre, 600 metre, 800 metre, 1500 metre, 2000 metre, 3000 metre, 4X100 metre Relay, Discus Throw, Javelin Throw, Shot Put, High Jump wa Long Jump ya kiwa da bhah ha ki le kyrdan ka U-14, U-16 wa U-18 neibynta ki chynrang wa ki kynthai.
