Da: U Chandame Sungoh
Haba nga ong u Khasi ka mut u Khynriam, u Pnar, u Bhoi, u War, u Lyngngam u Maram. Ban jubab ïa kane ka jingkylli te la sngew eh shisha namar ba ka jingpyrshang jong ngi ban ïatylli ïa ryntih kan shu kut tang haki jingkren ne ki jingpyrshang bad lyngba ki dak ki shin jong ka jingtyllun jong ka por ngi ïoh-i ba kata ka lyer jong ka jingïapait ïapra kadang beh dang beh. Kumba ong da mano rea, “Ka jingïashun ïabishni kadei ka raibi u Khasi”. Haka jingsngew jong nga u khynnah, kane ka ktien ‘raibi’ kadei ka sniew ka smeh kaba hiar pateng la pateng kaba u briew um lah shuh ban bret ne pynduh pyndam. Kumta kane ka jing ong kadei shisha namarba naduh myn hyndai kulong kumah ruh ngi ïoh-i ïaka jingïapait ïapra bad dei nakane ka daw te wat ka jait bynriew kaba tang shitroh ruh ka don haduh laiphew syiem bad khad-ar Dolloi, lada ngi ïa nujor bad kiwei pat ki jaitbynriew te ka jingdon jong kine ki laiphew syiem ha ki hima Khasi bad Khad-ar Dolloi ha ri Jaiñtia kam dathew ïaka jingheh jingïar ne jingbun pait jong ki Khasi Jaiñtia, hynrei ka thew pynban ïaka jingïapait ïapra. Jin lada ngi ki Khasi Jaiñtia ngin long tang kawei ka hima, tang u wei u syiem tang u wei u Dolloi te katno kan long ka jingkhlaiñ bad jingkhraw bor, pynban ymdei kumta, naka daw ka jingbun kine ki it ki hima ki elaka ki Dolloi te haka jaka ban khlaiñ bor te ngi tlot pynban bad haka jaka ban ieng ïaleh ia u nongshun te ïaleh pynban para Khasi.
Naduh ka pateng ki meirad parad, ki kmie ki kpa jong ngi bad haduh haka pateng jong ngi mynta ruh ngi ïa pyrshang ban wanrah ïaka jingïatylli ïaryntih hynrei khlem poi sha ei sha ei ruh bad dei hangne keiñ baka don ka jing ong,” Ynda ïatylli u Khasi te lawai ka pyrthei”.
Haba nga thoh kumne, nyam mut ban pynrem ban beiñ ban khoh ne ban pynjem daw ïala ka jait ka khong hynrei dei ban wad hi ïaka daw ka jingpang khnang ban tip ban sumar ban ai dawai dashin.
Related posts
To ngin ïapeit katto katne tylli ki daw kiba pynshisha ïaka jingïapait ïapra jong ka ri bad ka jaitbynriew jong ngi. Ngan ym kdew shuh shibun tylli ki nuksa hynrei to ngin ïa peit tang katto katne tylli:
- Ki jingmih bun tylli ki Party ne ki seng saiñ hima
Kumba ngi la ïatip ba ka Party ba nyngkong duh jong ka jingïaleh State Meghalaya jong ngi kadei ka EITU (Eastern India Tribal Union). Hadein nangta mih ka jingïapait ïapra bad mih daka party u Capt. W.A. Sangma ka All Party Hills Leaders Conference (APHLC)
Bad ha kane ka Patry ruh mih ka jingïapher jingmut ha kaba u Capt. W.A. Sangma bad u bah B.B. Lyngdoh kila beh seng ïa u bah Hoppingstone Lyngdoh tang namar ba um treh ban pdiang ïa kata ka State shiteng kaba khlem u pud u sam. Kumta mih saka Party Hills State People Democrats Party (HSPDP), mih saka United Democratic Party (UDP), Khun Hynñiewtrep National Awakening Movement (KHNAM) bad kiwei kiwei. Hynrei wat tang kawei na kine ki Party ruh kim lah thaw pyrthei ei ei ruh, mih pynban tang ka jingïapait ïapra bad ïoh thaw sorkar pynban daka NPP ka Party u Garo.
- Ka jingmih bun ki niam ki balang
Naduh mynshwa kulong kumah haka por ba ngi dang don haka Niam Khasi /Niam Tre ruh ngim long ki juh ki blei ki dken. Ki Khynriam ki don laki jong ki blei, ki Bhoi laki jong ki blei, ki Pnar laki jong ki blei kum ka nuksa, ka Taro Pnar bad u Thlen Khasi. Ym tang kane, wat tang para Khasi ne para Jaiñtia ruh ki dang ïapher ka leh niam leh rukom, ka kñia ka khriam, ki blei ki dken, kum ka nuksa ka lehniam leh rukom ki Jowai bad ki Nartisng ka dang ïapher, ki Sutnga bad ki Raliang ruh ki dang ïapher. Tang hapoh ka Elaka Jowai ruh ki Jowai ki don laka jong ka Behdeiñkhlam, ki Tuber laka jong, ki Chyrmang laka jong bad kumta ter ter. Ym dei kum ki Hindu kajuh ka sngi Durga Puja ha baroh kawei ka ri India bad kum ki Muslim kajuh ka Id ha baroh ki paid riewngeit ha shityllup ka pyrthei. Kane ka pyn-i ba ngim don ka jingïatylli haki rukom ngeit rukom mane wat mynba ngi dang don haka wei ka niam ruh.
Nangta wan saka niam khristan bad napdeng ki khristan mih saki kynhun balang kum ki Presbyterian, Catholic, Church of God, Church of North india, Baptist, Seventh Day Adventist, Unitarian bad kiwei kiwei. Nalor kine mih saki ne ki kynhun balang ba bun jait kiba ki khot ki Fellowship. Bad sngewsih shuh shuh ban ong ba bun na kine ki kynhun balang ki mih naka daw ka jingïapait ïapra bad ka jingbym ïasngewthuh jingmut. Haba kumne te ngi nud ban ong ba kum ki Khristan ngi dang lah ban ïalong kawei? Bad haba ngim lah shuh ban ïalong kawei te ngi dang lah ban ïatylli ïaryntih? Sa jubab hi maphi ki nongpule .
- Ka mat kaba lai bad kaba khatduh kaba nga kwah ban pynpaw ka long ka jingmih bun ki seng bhalang
Katba dang ïaid ki sngi ki por ka jingmih ki seng bhalang hangne ha ri jong ngi kalong sha ba palat, kalong shisha thik kumba ong da mano rea te la kum ba mih ki tit khlaw haka por lyiur. Bunsien ngi shem ngi lap ba bun na kine ki seng bhalang kidei ki riewthok riew shukor, ki kam ialade kum ki riew ieit ri ieit jaitbynriew tang ban ïoh bam duh ïaka. Bad ka jingmut jingthmu jong ki ha kaba thaw seng ka long tang ban khrong pisa, ban ïoh bhah naki pulit, naki Weighbridge bad na kiwei kiwei de.
Ha kine ki por bala dep nga ïoh-i bun ki seng bhalang kiba kyrshan ïaka Star Cement naka bynta ka par mawshun ha Brishyrnot, ki long ki seng ki bym juh ïoh-i ne juh ioh sngew haka imlang sahlang hynrei ki paw kyrteng tang haka Star Cement ban ïoh bai sikret, ïoh bai khor khyndiat khynsoit. Haka jingshisha haba ong “Seng” ka mut la kumno kumno ruh dei ban don saw san ngut haka wei ka seng, hynrei hangne ha ri jong ngi te ym dei kumta ka long pynban saw san tylli ki seng ha u wei u briew.
Ha kine ki bnai Lockdown ha ki por bala dep ngi ïoh-i bun ki seng bhalang kiba ai jingiarap ïaki briew daka pisa, da u khaw bad daki marbam mardih. Kumta, kiba pli ki bymtip te ki ong ade!, katta katta ka seng te ka lehbha shisha, ka bun pisa shisha baka ïoh ban lehbha katta katta. Hynrei ngim ïatip pat na ei ki ïoh ïa kato ka pisa bad kito ki marbam mardih. Bun ba ki ïoh naki Sawmills be-aiñ, naki Check-gate, naki Weighbridge, naki Cement Factory, naki nong khaïi dewiong be-aiñ, naki dkhar hehspah, naki nongkhaïi masi be-aiñ, naki Officers bamsap bad nawei nawei de. Kane ka nang pynsniew shuh ïaka imlang sahlang, ïaka ri bad ka jaitbynriew. Namarba kine ki nong Sponsor ne ki nongai ki don ka plan kaba sha lyndet khnang ba kin ïoh jingkyrshan ne ban lait naka jingpyrshah lada ki leh ia kano kano ka kam kaba ktah iaka imlang sahlang ïaka ri bad ka jaitbynriew. Kane kadei kawei naki daw bah dawsan kaba pynlong ïaka ri bad jaitbynriew jong ngi ban bun ban kharoi ki kam be-aiñ.
Wat tang para seng bhalang ruh ym ia sngewthuh jingmut shuh. Kumba ngi ïoh-i lyngba ki dak ki shin te u la don uta u syieng tyrkhong hapdeng ka seng KSU bad HYC haduh ba ki mih ki jingia beiñ ïakynnoh bad wat ka jing ïakdew kti markylliang ruh. Ka lynti kaba ka KSU ka iaid ka HYC kam treh shuh ban ïaid bad haka jaka ba don ka HYC ka KSU kam bit shuh ban don, ïa kane nga kren tang hapdeng ki seng heh ïa ki seng kiba kham hadien lei te ynnai ïakren shuh. Ngi ki paitbah lei te ngim tip shuh ka jong no ka dei ka jong no kaba lait hynrei tang kane ka wei kumba ong ka ktien,”Ka jingïaleh mar kynti kam juh wanrah ïaka jingjot tang shiliang”. Te kine kiei kiei baroh ruh kidei ki dak jong ka jingïapait ïapra jong ka ri bad ka jaitbynriew.
Kum ban shu kdew khyndiat, tang ha kane ka phang jong i bah Cheristerfield Thangkhiew ruh ka wanrah pynban ïaka jingïapait ïapra hapdeng ka ri bad ka jaitbynriew, kumba ngi ïoh-i ba wat ha Assembly ruh haduh ba ki liang pynshah ki ia mih jyndat na dorbar. Bad haka 15-09-2021 haka jingïalang ha Dorbar Hall Mawlai Phudmawri ruh haduh baki lai seng kila ïamih jyndat na ïng dorbar ba ki pyrshah ïaka rai ban thung ïaka Sur ki Paid ka Bri U Hynñiewtrep bad haka sngi kaba bud ngi la ïoh-i ïaka jing ïakawang ktieh hapdeng ki nong Mawlai hi haduh ba mih kita ki kyntien synlen lyndum bad kine ki tai. Kine baroh ki dei ki soh kiba mih naka jingmut jingpyrkhat bymman bad ka mynsien ïashun ïabishni u Khasi.
Lada ngi peit hapdeng ki shnong ki thaw ki hima sima ki raid ki elaka ruh kidon shibun ki jingïapait ïapra bad ki jingbym ïa sngewthuh jingmut. Kum ka nuksa, jan baroh ngi la ïatip shaphang ka jingïa khajia hapdeng ka Raid bad ka Hima jong ka thaiñ Langpih, ka jing ia khajia hapdeng ka shnong Barato bad Maitdeiñ, ka jingïaknieh pud hapdeng ka Elaka Sutnga bad Elaka Nongkhlieh kiba la sahteng daki phew phew snem khlem lah ban ïa pynbeit ne ïahun ïasuk.
Wat haka trei ka ktah ka kam ka jam ruh ngi ïoh-i ïaka jing ïashun ïabishni , ngim don kata ka mynsiem ban ïatrei lang lane ban ïa aibor ai mynsiem ïaka ban ïa kiew lang lane ban ïaroi ïapar lang. Ngi long kum kita ki tham hapoh dabor kiba ïa woh ïa tan para mangi bad dei na kane ka daw ba ngim poi sha ka thong.
Para mangi, para Khasi te ngi ïanud shisha ngi ïakhlaiñ shisha hynrei ha khmat u nongshun te shu pyndem tdong kum u ksew rem ïadait. “U Thlen Khasi u bam tang ïaka snam Khasi bad ka Taro Pnar ka bam tang ïaki Pnar”. Kane te thik kadei shisha ïangi ki Khasi Pnar. Lyngba ki jinglong jingman jong ngi kiba ngi lap ngi shem haka jingim jong ngi kaba man ka sngi.
Bad ngi ïoh-i ba kata ka jingpyrshang jong ngi ban wanrah ïaka jingïatylli hapdeng ki seng saiñpyrthei, hapdeng ki seng bhalang bad hapdeng ki kynhun balang Khristan kalong tang ka jingïaid lynti kaba ymlah shuh ban poi shaka thong.
