Jowai : Wow e mynsien chooh chooh ya ki khynah puræ yong ka Ri-Loom Jaiñtia kiwa poi chakhmat ha ki Exam yong ki ha i kyrdan puræ Secondary School Leaving Certificate (SSLC) wa ka Higher Secondary School Leaving Certificate (HSSLC), chim ka Akhil Bharatiya Vidyarthi Parishad (ABVP) wow pynmih ya ka Award kyrpang wa tip pyrtuid kam “U Kiang Nangbah Best Students Award 2016”.
Ya kani ka prokram da pynman ynne ha Tpep-pale heiwa ya ka yalang da pyllai da ka khyllood D. Tang katwa u khynroo Trekular Suchiang ha ka bynta wakut yieñ u wow e ki kyntien khublei.
U khynroo Skemjingmut Law, hei batai chaphang ka ABVP da ong u boon na ki bru næ ki khon khynroo ka ri loom Jaiñtia jngai ki nei ya embynta wa ka seiñ ABVP dei wa chim wa kani toh ka seiñ ki dkhar næ ka seiñ yong ka Niam Hindu, ong u kam kini kiyi kiyi ki rukom pyrkhat toh kiwa bakla. Iwa khaddooh uni u khynroo ong u, i chim ka seiñ u pynman ya kani ka sngi hei wow e ya kani ka Award cha kini ki payu para toh man ko i sdang donhi, tæ neini chakhmat ka seiñ daw chim chooh ko u leh chiboon ki kaam kiwa yatoh kat kam ka thong wa ka nongrim krehkaam yong ka ha waroh kawi ka ri India.
Ka kong Dreambon Kharkongor kam kawi na ki manbei waman leh ka khlieh wow pait ya ka seiñ hapoh ka jylla, hei pachat ya ki kyntien kam ka symbood kongsan da kdar ko wow booh ki kyntien e mynsien wa ki kyntien pynchlur ya ki khynnah skur wa ki khon khynroo deiwa khana, pynsniaw ya ka nongrim krehkaam yong ka seiñ neitæ kdar ko leh wow khanna ya ki nongmuna wabha chaphang u Swami Vivekananda kamjooh yow woh Kiang Nangbah.
U ma W.S.Challam, Retd. Jt. Director Education & Literacy, Govt. of Meghalaya hei e ya ki kyntien kam u kongsan da yaroh u ya ka seiñ kawa da chimkhia u pynman ya kani ka prokram neitæ won ki kyntien choh yumut yong oo ya ki khynnah skur toh kiwa ong u, ym em eh wow poi cha ka thong, lada man phi kiwa kitkhia yei kaamram yongphi deilang rai kut mynsien wei yaichah. Khaddooh uni u waheh pynkut u yei klam yong oo dei wa booh ki kyntien kitbok kitrwiang ya ka seiñ wa ya ki dkhot waroh.
Ki khon khynroo khyllood ka ri loom Jaiñtia kiwa da yoh ya kani ka Best Students Award hei pyrtuid yong u Kiang Nangbah ha uni u snem toh em ki hadooh 30 ngut heiwa kiwa pass ya ka Secondary School Leaving Certificate em ki kamwa 19 ngut katwa kiwa pass won ya ka Higher Secondary School Leaving Certificate 2016 em ki kamwa 11 ngut, kheiñ kyllumlang waroh ki khynroo wa yoh ya kani ka Award em ki 14 ngut katwa ki khyllood won em ki 16 ngut.
Discussion about this post