Ka Tympang Club, Jowai haka 29 tarik da ye ko u wai yaka yung Hall wa pura yong ka kawa da tip ka kam ka Larsingh Khyriem Memorial Auditorium Cum Indoor Sports Hall hadien da ki phaw snem i lai luti wow chna dei kreh chitom kiwa yahkhmat chnong na kawi ka Executive Committee hadien kawi.
Ya kani ka Hall da e naam hei pyrtuid u (L) Woh Larsingh Khyriem kam ka dak i sñiawngooh sñiawburom yei kaam wa khroo wa leh u neibynta ka Club khamtam i yoh yaka thaw wow pynyieñ ya kani ka yung Hall toh lyngba i yarap klam yong oo wa u Premier ka Assam ha u snem 1948 heipor wa dang man u kam u MLA, kamtæ ka sorkar da mynjur ko u e ya kani ka thaw haka Tympang Club.
Da wan wow wai paidbah ya kani ka Hall da ka Carolina Lamare kawa da heh rta dooh hapoh ka Club, wei kamwa da e naam ya kani ka Hall hei pyrtuid u (L) Woh Larsingh Khyriem, da wai leh ya u mot dur sahnaam yong oo uwa booh ha kani ka Hall. Wei chwa wow wai paidbah da yoh i duwai kyrkhu kyrpang na u S.C. Laloo, MCS.
Neitæ haka yalang tbian wa da pynman hapoh yung Hall hei pynlai u Edelweiss Roger Dkhar, neiliang u Homeland Lamar uwa jooh ksoh yei kaam Secretary Construction Committee nadooh wa sdang chna ha u snem 2002 hadooh wa dep chna ya ka, da khana u yei lai luti ka Club hapoh ki 13 snem wa ksoh u yei kaam.
Da pyntip haroh u wa i lut neibynta u chna ya kani ka Hall da khynjoh ko cha ka Rs. 89 lak tam, neibynta ka VIP Gallery wa em hajrong da pynlut Rs. 27 lak lyngba i yoh yarap na kylleiñ katwa neibynta ki kynja rana yow chong wa chna hapoh won da pynlut naka Club.
Da yoh leh i klam naka pyrsa waka khon u (L) Woh Larsingh Khyriem, ka Manika Khyriem waka Wimon Tariang kiwa da e i sñiawngooh yaka Tympang Club hajrong i booh naam ki, wei yooluti ki leh wa kani ka Club u nang ku ko chaphrang.
U Teiborlang Passah Adviser ka Tympang Club, Jowai hawa klam da khana u yei sdang ki Club haka pyrthai, kamjooh ka yumut yong ka Club iwa yatoh waka imlang sahlang.
Heiyatoh waka Tympang Club won ong u toh ka Club wa da sdang nyngkong dooh ha Jowai, wei ha kani ka janmiet man i wow sah kynmoo wei pynkmen yaki dkhot wa da yoh yei yimphoo wa da angnood da slem. Hanla boon ki dkhot ki wym ye de u emlang ha kani ka sngi leh pynsñiaw u i sñiawngooh yaki hajrong i bynta wa khroo wa da noh kyllooid mynsien ki cha kani ka yung yonglang neibynta i bha i miat ki khon ka Club.
Ha kani ka sngi ka Tympang Club chim haroh ko ka laad u pynkup burom yaki para dkhot wa da heh rta, cha ki yung ki sem kiwa da embynta u kyntu kynrong yaka Club, kamjooh leh i e khusnaam cha ki khon ka chnong kiwa da lehbha haki Exam waphær waphær.
Discussion about this post