Ynne ka 22 tarik kawa man ka lyngkhooh snem wan yoohkjat u Thomas Jones ha Ri-loom Khasi ya uwa da tip leh kam u pa ki dak thoh Khasi, kamtæ neiliang ka Khasi Author Society chnat Jowai chirup waka Thomas Jones Synod College, Jowai da kynmoo tympang ki ya kani ka sngi deiwa pynman yaka lympung ya phyllu yumut ha Thomas Jones Synod College.
Haka kynta ya phyllu, neiliang u Dr. D.R.L. Nonglait, President Khasi Author Society, Shillong da klam u hajrong ka phang “U Synniang u Thomas Jones sha ka thoh ka tar”.
Wei lyngba kani ka phang da kyruiñ dien chwa u cha ka tynre wa i lai luti u Thomas Jones chwa wow wan yooh kjat u cha Ri Khasi yow leh ya ki kaam khroo heiyatoh wa i thoh i taar.
I daw wa pynman ya u Dr. D.R.L. Nonglait u chim u ya kani ka luti toh wa hadooh katni ym pu em wa thoh hei ktien Khasi yei tre yong u Thomas Jones lait noh iwa thoh da kiwa boon hajrong i im yong oo kam u Missionary wa nyngkong yong ka Wales manda poi u cha ri Khasi.
Wei kamwa sñiaw emkaam u wow chim ya kani ka laad ka luti neibynta yow tiplang kiwa boon, kamtæ waroh iwa khana u ha kani ka sngi da booh haroh u dei thoh, heiwa da thoh u nadooh i tre jaitbru wa wan u Thomas Jones wa i tynre i rukom ngait wa kiwi.
U bru chemphang wa bood won u klam ha kani ka sngi toh u Rev. H.C.T. Sumer uwa da klam hajrong ka phang “U Synniang u Thomas Jones sha ka imlang sahlang”.
Chwa ini haka yalang wai ya kani ka yalang ya phyllu wa pynlai daka R.M. Khonglah, Joint Secretary chnat Jowai, Khasi Author Society, u Rev. K. Pariat, Senior Executive Secretary KJP Synod Mihsngi da man u kam u kongsan hei emlang u Dr. K.D. Ramseij, Vice President Khasi Author Society Shillong, u Principal ka Thomas Jones College, u Dr. D.G. Lyngdoh, kiwa sikai wa ki khynroo khyllood wa lai puræ.
U Rev. K. Pariat hawa klam kam u kongsan ha kani ka sngi ong u wa kam kani ka sngi lyngkhooh dap 182 snem i wan yooh kjat u bru khroo Thomas Jones cha Ri-loom Khasi Jaiñtia toh u e yei yaroh neibhah toh oo wa yahluti hapyrdi i doom wa tymmoh yaka jaitbru la hei dooh, i ngait, i wow tip tip yei lehkhooid wei khamtam heiyatoh i thoh i taar.
Heijooh i por yaroh u leh yei em ka seiñ Khasi Author Society wa man ko kam ka chrot wa yieñ neibynta u pynneh pynsah yaka ktien Khasi, wei heijooh i por wa da lai ko chakhmat neibynta u dawa yoh noh i tipmit yaka ktien Khasi hapoh ka 8th Schedule yong ka riti shynchaar ka ri, najrong wa pteiñ ki yei thoh ki kot waphær waphær.
