Hei sien wa nyngkong dooh ki jaitbru ri-loom wa tip kam ki Shompen Tribe kiwa im ha Andaman and Nicobar Islands da chimbynta ki wow thap Vote deiwa pynemkaam yei hok ki ha kani ka Lok Sabha Election 2024.
Kiwa da wan chakhmat na kini ki Shompen wow thap Vote da em ki 7 ngut wei kini toh kiwa da tip leh kem ki Particularly Vulnerable Tribal Groups (PVTGs) ha India ki wym pu tip bha chiboon chaphang yong ki kiwa im chapoh ki khloo wa rben ka Great Nicobar Island, wei da im ki para ki donhi.
I thaw wa sah ki toh ha i bynta ka South Great Nicobar Island, wei man i leh i bynta wa kut i khyndaw ka ri India wei ym jooh bien ki wow wan tia chajan kiwon kiwon kiwa poi cha ki næ ki chipai sorkar kiwa em ha ki bynta wa em ki.
Ym tip wa lada sñiawthooh ki namo ym em iyi mut wow thap Vote wei da klam ki leh dei ktien yong ki hi wei ym em skur ha ki thaw wa sah ki.
Yow pyrchang wow yaklam wa kini ki jaitbru Shompen, da em ka Adim Janjati Vikas Samiti (AAJVS) kiwa kreh wow pynsñiawthooh wei neiliang u Chief Electoral Officer ka Andaman and Nicobar Islands Parliamentary Constituency, da booh u da ka Shopem Hut Polling Station, heiwa da wan 7 ngut ki jaitbru Shompen kiwa da thap Vote na ki 84 ngut kiwa da yoh Vote wei katkam ka Census 2011 da em ki 229 ngut waroh.
U CEO da pyntip u leh wa kiwi ki jait bru ri-loom kiwa man man ki PVTGs kitæ ki Onge Tribe da em 63 ngut kiwa wan thap Vote na 68 ngut, ha Strait Island da em 33 ngut kiwa thap Vote na ki 39 ngut neitæ 33 ngut na ki Great Andamanese Tribe (PVTGs) kiwa da wan wow thap Vote.
Ki kyrtong waroh da em ki 7 ngut wa kynthup ya ar ngut ki kynthai wa san ngut ki chynrang wei ka yaleh man ko hapyrdi ka Congress wa BJP.
Discussion about this post