Ka phlim wa pawnaam wa da pynmih napoh Ri-loom Jaiñtia kawa tip kam ‘Ka Chithi’ hadien wa da pynyoo ka ha kiwa boon ki thaw hadooh cha baar jylla, hei sien nyngkong u pynyoo ka ha Shillong nadooh ka 7 tarik hadooh ka 12 tarik uni u bnai ha U Soso Tham Auditorium deiwa pynyoo le sien chi sngi itæ heipor 2:00 waje i sngi, heipor 4:15 noh charaiñ ka sngi wa heipor 6:30 i janmiet.
‘Ka Chithi’ hei yahluti ka Simi Khongtiang kam ka Director da yoh ko leh yei tipmit hapoh ka ri heiwa da pynyoo ka leh ha ki kattu katni ki tamasa pynyoo phlim namo ki Film Festivals wei da yoh ka Simi leh yei naam Best Director Award haka Prag Cine Awards neitæ dadep lai pynyoo ya kani ka phlim leh ha Bengaluru International Film Festival waka North East International Film Festival ha Imphal wei daw pynyoo ka leh ha Habitat International Film Festival, New Delhi haka 8 tarik uni u bnai.
Lyngba kani ka phlim da ye leh wow pynyoo pyrthai yei rukom im kamjooh ka dustur riti kiwa napoh Ri-loom Jaiñtia, kamtæ neiliang ka Simi Khongtiang da khut sñiawbha ko ya phi ki paidbah wow wan pait ya kani ka phlim kawa rap phær na kiwi.
Ka Simi da pynsñiaw ko leh yei sñiawngooh ya u Montri ka chnat Arts and Culture, uwa da sñiawthooh yei kaam ka sorkar wow pynkhlan yaka karkhana pynmih phlim deiwa yaroh leh yei rai ki wow pynyoo ya kani ka phlim ha U Soso Tham Auditorium, iwa pynyoo wa sñiawthooh ki leh yei chem chitom kiwa pynmih phlim wow lai pynyoo phlim hapoh ki baiscope.
Ka bai Ticket man ko Rs. 250 wa Rs. 150.
Discussion about this post