Ka seiñ EJNC-Khliehriat Circle da phah chithi ko cha u Deputy Commissioner ka East Jaiñtia Hills District, u E. Kharmalki yow dawa pynkhor yei rukum sylli ha Ratacherra Entry-Exit Point neidaw wa da joor pteiñ i psiah kiwa na baar cha Khliehriat khamtam heipor miet.
Ha ka chithi da ong wa da chem wa boonsien ha ki ha ki tayaw wa da dep da em ki bru wym tipmit kiwa em kamwa 40-50 ngut kiwa heipor kamwa 12 waje pyrdi synyaw ha thaaiñ Khliehriat East Area kiwa lai chapoh khloo deiwa rah lang wa ki muna kiwa boon kiwa da yoo la kamwa lai chong chnong ki wei kini ki bru ym toh kiwa chong chnong ka Khliehriat.
Da suba leh wa kini ki bru toh ki nong Bangladesh lane kiwa na Assam kiwa da psiah pyrchah ya ka aiñ chapoh ka East Jaiñtia Hills District hei miet, kamtæ ka seiñ da ong ko wa ini pynyoo che wa ym em biang i krehkaam ka Ratacherra Entry/Exit Point wym em pynkhor pynrkhiñ yei rukom sylli yei psiah kiwa na baar chapoh ka District.
Da ong leh wa neidaw wym em ki pulit wa uiñ sonteri dei miet, ym em wa kem ya kiwa psiah pyrchah ya ka aiñ chapoh ka District. Wei ini toh iwa sñiawkhia kiwa chong chnong yow lait nei chah ktah i suk i saiñ wa i krehkaam ka aiñ.
Chooh chooh da ong wa ini i wan psiah ki baar chnong daw ktah ko leh ya ki tre chnong nadooh i boon paaid, ka khayi pateiñ wa i yoh khih yoh kreh ki tre chnong.
Kamtæ da kyntu nadooh ya u SP (Infiltration) yow chimkhia ya ini i kaam neibynta i bha i miat kiwa chong chnong wei lada ym leh ya ini, ka seiñ daw chim ko yeini i kaam hei kti yong ka hi.
