Ki ar ngut ki MLA wa da chah beh noh chipor namo kiwa da chah Suspend na ka seiñ Congress, katæ ka Dr. Mazel Ampareen Lyngdoh kawa man ka MLA yong ka East Shillong wa u Mohendro Rapsang uwa man u MLA yong ka West Shillong da hiar chuki noh ki nei man kam ki MLA ynne ka sngi.
Kini ki ar ngut ki MLA da hiar chuki ki deiwa pyntip lyngba i thoh wa da e cha u Lamphang ka Yung Dorbar Chna Aiñ, heiwa ya ka chithi hiar chuki da e kti ha u Commissioner & Secretary ka Meghalaya Legislative Assembly, u Andrew Simons.
Kini ki arngut ki MLA da khana ki wa myntu hi ka sngi daw lai psiah ki kam ki dkhot wa pura ka National People’s Party (NPP) ha ka yalang wa daw man ha Madan Ïewrynghep.
Kam wow pynkynmoo wa ki 5 ngut ki MLA yong ka Congress da lai ki wow e kyrchaan wei u ya krehlang ha ka sorkar Meghalaya Democratic Alliance (MDA) ha u Thohlakhmi (Feb) uni u snem. Wei na ini i daw wa lai e kyrchaan ya ka sorkar MDA kawa ya krehlang wa ka BJP, ka AICC da pyndam noh ko chipor ya kitai ki MLA wow man kam ki dkhot ka Party Congress pyn ha utai hi u bnai.
Kini ki MLA kynthup ki ya ka Dr. Ampareen Lyngdoh wa u Mohendro Rapsang kiwa da hiar chuki noh ynne ka sngi wow yakhun noh na ka NPP, ki 3 ngut kiwi won ki MLA kiwa kynthup ya u Process T Sawkmie MLA yong ka Mawlai wa u Mayralborn Syiem MLA yong ka Nongpoh toh kiwa ye u lai yakhun noh na ka UDP, katwa u Kimfa S Marbaniang MLA yong ka Rambrai Jyrngam toh uwa ye u yakhun na ka NPP.
