Ka India kawa man kam kawi na ki ri wa khlan dooh wow chalan phñiang baam na baar ri neidaw wym ye u pyndap yeiwa emkaam hapoh ka ri heiwa 56-60% i phñiang baam wa em hapoh ka ri toh iwa da wanrah na baar ri. Kamtæ i dor i phñiang baam da chong hei dor ki yaw kiwa boon ki ri kamjooh ka dan wa da kheiñ ki iwa da ktah kylla yei dor wa da dai hapoh ka ri.
Neiliang ka sorkar ini wa dep da pynduna ko ya ka dan (Basic Duty) la chi snem kawa kheiñ ha i Crude Palm Oil, Crude Soyabean Oil wa Crude Sunflower Oil deiwa ah naka 2.5% cha nod. Ka Agri-Cess yong waroh kini ki phñiang da pynhiar cha 20% na 7.5% neibynta i Crude Palm Oil wa 5% neibynta i Crude Soyabean Oil wa Crude Sunflower Oil.
Neiliang ka Ministry of Consumer Affairs, Food & Public Distribution da pyntip ko wa ini da yarap bha wow pynhiar yei dor phñiang baam ha ki yaw ki haat wei katkam wa chem na ki 167 tylli ki thaw wa i dor phñiang baam da hiar i da T. 5 hadooh T. 20 chi kilo ha kiwa boon ki yaw ha kylleiñ ka ri. Kiwa pynmih phñiang baam kam ka Adani Willmar wa Ruchi Industries da pynhiar dor ki da T. 15-20 chi liter. Kiwi de kiwa da pynhiar dor toh ka Gemini Edibles & Fats India, Hyderabad, Modi Naturals, Delhi, Gokul Re-foils & Solvent, Vijay Solvex, Gokul Agro Resources & N.K. Proteins.
Ka sorkar da pyntip ko leh wa yow ye u kdoh u khoom yei ku dor kiwa boon ki jait phñiang baam khamtam wa yatoh wa u Soya Meal. Da booh leh ya ka Stock limit heiyatoh wa i Soya Meal iwa man leh iwa em 30% ha i baam wa e cha ki mrad nadooh ka 23-12-21 hadooh u Naiynru 2022 deiwa kynthup lang ya ini hapoh ka Schedule ka Essential Commodities Act, 1955. Ka sorkar da khang ko leh yei khayi (Trading) ya waroh ki mar wa emkaam neibynta chi snem hadooh u Kmaichonglad (Dec) 2022.
Ini wa dep ka sorkar pyrdi da pynbna ko leh ya ka National Mission on Edible Oils – Oil Palm (NMEO-OP) kawa da kyrpang neibynta ka thaaiñ Northeast waka Andaman and Nicobar Islands yow pynku yei pynmih phñiang baam hapoh ka ri.
Puræ leh: Sdang hiar dor ki phñiang baam
