Ka sorkar pyrdi lyngba ka Ministry of Consumer Affairs, Food & Public Distribution da pyntip ko wa ha kylleiñ ka ri da hiar i dor i phniang baam hawa chim yukheiñ ya u Naichiphaw 2022 wei ini da man i deiwa chim ka sorkar ya ki laad ki luti wow pynneh yei dor ki mar wa emkaam man-ka-sngi.
Da thung leh ya ka Committee da ka Department of Food & Public Distribution yow pait yei dor ki mar wa emkaam kawa pyntip kylla cha ka sorkar yeiwa emkaam u leh ko.
Ka sorkar da dep ko leh wow pynhiar ya ki dan kam ki Import Duty waka Cess yong ki mar kam u dai (Pulses), deiwa booh kyndon leh hadooh katwon wa hoi u booh namo wow Stock yow lait nei duna ki mar ha ki yaaw ki haat yow lait nei ku dor.
Kamwa man kattæ i dor i phniang baam toh iwa da neh khlem khih deiwa pynrkhiñ kyndon lang kiwi ki yaaw ki haat ka pyrthai kamjooh ki sorkar.
I dor i phniang baam da hiar i ha ki yaaw ki haat ka pyrthai da USD 200-300 chi ton ha kini ki ar bnai wa da lai.
Ha kini ki le bnai wa da lai i dor i phñiang baam Refined Sunflower Oil da hiar da cha 170/kg na T. 181/kg, i Vanaspati da hiar na T. 154/Kg cha T. 146/Kg katwa i Refined Soyabean na T. 157/Kg cha T. 154/Kg. I Mustard Oil da hiar na T. 173/Kg cha T. 170/Kg. Deiwa kheiñ kyllum lang hapoh ka ri, i dor i RBD Palmolein da hiar cha T. 119/Kg na T. 138/Kg.
Ha waroh kawi ka ri i dor i RBD Palmolein, Refined Soyabean Oil, Refined Sunflower Oil, Mustard Oil wa Vanaspati da hiar dor i da 26%, 9%, 12%, 9% wa 11% ha kini ki 6 bnai, da pyntip ka sorkar pyrdi.
