Shillong: Ka Executive Committee yong ka Khasi Hills Autonomous District Council (KHADC) da hiar ko cha ka chnong Balakhawa kawa em khappood wa ka jylla Assam kawa haap hapoh ka Hima Nongspung hadien wa ha ka 8 tarik uni u bnai ki paidbah kiwa na ka chnong New Balakhawa, Ranibari wa na Birnongsai ki da lai ki wow thombor wei wow hiar thma ya ka yung u Michael Warjri, Secretary ka Hima Nongspung.
Ha ini i lai sylli yong ka KHADC wa da yahkhmat da u CEM, u Teinwell Dkhar da yoh ki wow yoo dei khmat ya i chah tympra i yung wa i chah thombor.
Ha kani ka sngi da synraan leh da u MDC ka Jirang uwa man leh u EM, u Victor Ranee, u Titosstarwell Chyne wei kamjooh u Syntar Klas Sunn MLA na Mawphlang, u Syiem ka Hima Nongspung, u Paiem Patrick Syiemiong kiwa yahkhmat ka chnong wa ki dkhot na ki seiñbhalang deiwa emlang leh ki bor District kiwa da synran lang ya kani ka lai sylli.
U Teinwell Dkhar da ong u wa ini i leh yong ki damok toh u beiñ joor. Da ong u wa i daw wa ka KHADC chem ko toh hajrong i pynkrehkaam ya ka Scheme PMGSY da ka Assam khlem tip yong ka Hima.
Da ong u wa ka KHADC daw chim ko ya ka rai wow pyrkhat ya kani ka kaam, wei daw pyrchang leh wow wanrah noh ya u Michael cha ka chnong yong oo katni uwa em ha kti ki pulit Assam.
Neiliang u Paiem Patrick da ong u leh wa neiliang ka Hima daw yachem wa u CEM yow pynbor wa toh u wanrah noh ya u Michael khlem iwon iwon i pynchitom.
Da ong u wa kani ka kaam toh kawa dang thymme hanlada ka Hima ka em ko ki kot ki sla wa ki Map kiwa pynsakhiat yaka thaw ka bhaw kawa haap haka Hima wei ya kini ki kot da e leh cha ka Executive Committee warim ka KHADC tangwa ym em poi ko cheiwon cheiwon wei ym em bna leh ya kani ka kaam.
Discussion about this post