Ki le ngut ki bru wa da rap bna naam ha ka jylla heiyatoh wa i sap wa ki da lai luti ki hei im wa kynthup ya ka Jessie Lyngdoh kawa man kawa thoh sur wa kawa rwai kamjooh ka Associate Producer ha ka State of Mind Production, u Ferdinand Rani uwa man uwa thoh khubor kamjooh u Content Creator wa u Kamki Diengdoh uwa chna phlim wa riñdur ya ki phlim phlim (Cinematography & Editor), ynne ka sngi da hiar ki ha Khliehriat Higher Secondary School, East Jaiñtia Hills District wow khana kammon i lai luti yong ki hadooh wa poi ki hei kyrdan næ i naam i burom kamwa man ki katni.
Da wan wow ap u sñiaw wei yachem yumut wa kini ki le ngut da ki khynnah puræ na ki skur waphær waphær, wei ya kani ka rynsan da pynman wei pyntoh pyntne da ki Alumni næ ki khynnah skur warim ka Khliehriat Higher Secondary School, kam chibynta i lehkmen yei dap 50 snem kani ka skur.
I thmu ki Alumni wow pynman kam kani ka rynsan toh wa kwah ki u sñiawthooh ki khynnah skur heiyatoh waka laiñ pure Mass Media, neibhah wa kani em ko boon jait ki laad wa ye u sdang khih yow im-ja hadien habood.
Heijooh i por leh lyngba i yohlaad ki khynnah u yaklam ya kylli yumut na kini ki le ngut man iwa pynhun ya ki wei yoh mynsien.
Neiliang ka Simi Khongthiang kam kawi na kiwa jooh pure ha kani ka skur kyntu ko ya ki khynnah skur wow ap bha ki dei miat yei sur wa wan na u nood yong ki ha kayi ka laiñ puræ wa kwah ki, najrong wa ong ko leh kani ka laiñ yarap ko u pynyaar yei thij i pyrkhat ki bru ha ki bynta waphær waphær.
U Br. Solomon Swer, Principal Khliehriat Higher Secondary School hawa klam hadien wa kut ka yalang dap u dei sñiawkmen wow yoo yei ka’it ya chimbynta ki khynnah skur wow kylli, wei ngait skem u leh da yoh ki boon i sñiawthooh heiyatoh waka laiñ Mass Media wa Social Media.
Discussion about this post