Ka takit hajrong i chah pynbaad wa pynemkaam bakla ya ka poisa yong ka Khasi Hills Autonomous District Council (KHADC) heiwa da thied ko yei thaw ha Mawkyrwat da lai ko chaaid chaaid, heiwa ha ka 12 tarik uni u bnai, ki pulit ka Lumdiengjri Police Station da lai ki cha Mawkyrwat yow pait ya kani ka thaw.
Ini i lai pait man ko kam chibynta i takit hajrong ka FIR wa da e da u MDC warim ka Umsning, u Donkupar Sumer ha ka 17 tarik u April 2024 neidaw wa hadooh katni ka Council ym pu yoh ko wow mantre yei thaw wot hadien wa dadep su lut ya ka poisa. Katai ka thaw toh kawa da thied ha u snem 2014, ha i dor wa Rs. 300 chi square feet, kawa dapoi Rs. 35,25,039.
Ha ini i lai pait ki pulit da ya emlang wa u Donkupar Sumer uwa man kam uwa ujor yow pynyoo ya katai ka thaw kawa da thied da ka District Council, wei ha ini i lai pait da emlang leh u sahep wa pait ya ka chnat ka KHADC ha Mawkyrwat.
Neiliang u Donkupar Sumer da pynsñiaw u yei lyngngoh hajrong i wym pu yoh mantre ka KHADC ya katai ka thaw wot hadien wa dadep thied dei dor, wei kamwa yoo ha ki kot ki sla wa dadep wow yasoi, da ong u wa u tre thaw da yoh u du Rs. 10 lak neibynta katai ka thaw, katwa ha ka thup booh yei thoh (Record) wa em ha ka KHADC da kdaw che wa ya ka poisa kawa palat Rs. 35 lak dadep su lut.
Ha iwi i liang, u Donkupar Sumer da yaroh u ya u Chief Executive Member (CEM) wa da khlaad noh, u H.S. Shylla uwa da ye wow pynyoh ya ka thaw neibynta wow chna ya ka chnat krehkaam ka KHADC ha Laitlawsang, Mawkyrwat ha u snem 2018, khlem da emkaam u su poisa, wei katai ka chlem krehkaam da yieñ ko katni.
Puræ leh: Chah e FIR u Ardent ha u MDC warim wa sai tooh u Rs. 35 lak ka poisa ka KHADC
Discussion about this post