Ka National Testing Agency (NTA) ynnin da pynbna ko ya ka Result ka National Eligibility cum Entrance Test, Undergraduate (NEET UG) 2024 kawa da pynman sa chisien neibynta ki 1563 ngut ha ki 7 tylli ki Centre wa kynthup ya kiwa em ha Chhattisgarh, Gujarat, Haryana wa Meghalaya.
Na kini ki 1563 ngut kiwa da ujor wei da dawa wow pynman deiwi ya kani ka Exam neidaw wa thut i pynman ya ka heiwa da em wym biang i yoh Question Paper kamjooh wa pynsepai yei por, da em du 813 ngut kiwa da wan wow yaleh biang ya kani ka Exam.
Ya kani ka Exam da pynman biang ka ha ka 23 tarik u bnai wa dep heiwa ha ka Result wa da pynbna da hiar ki Topper na 67 cha 61 ngut wei ini i boon ki Topper da man leh iwi na ki daw wa da pynbaad wa em i lait tooh ki Question Paper neibhah nachwa ki Topper wa yoh 720 na 720 ki Marks jooh em ki du 4-5 ngut donhi.
Ha kani ka kynti da em leh 6 ngut kiwa da dep yoh 720/720 kiwa da chim biang ya kani ka Exam heiwa 5 ngut da lehbha biang ki deiwa yoh ki palat 680 ki Marks.
Hachwa wow pynman biang ya kani ka Exam, ka NTA da dep ko wow pynche wa i daw wa em boon kiwa yoh heh Marks toh neidaw wa e Grace Marks tangwa hadien wa poi ini i kaam cha ka Supreme Court, da pyndam noh ya kini ki Grace Marks.
Na kini ki 813 ngut kiwa wan yaleh, ym em wa ye u yoh Full Marks katwa kitu won ki wym em bien wow yaleh biang ya kani ka Exam daw yoh ki dei Marks wa yaleh nyngkong ki khlem da kheiñlang wa ki Grace Marks.
Katkam ka yukheiñ wa da yoh, ym em wan ki ar ngut kiwa na Chandigarh wow yaleh biang ya kani ka Exam, ha Chhattisgarh won da em 291 ngut na ki 602 ngut kiwa wan, uwi na Gujarat, 287 ngut na 594 ngut na Haryana katwa na Meghalaya da em 234 ngut kiwa yaleh biang.
Hanla dadep pynman biang ya kani k Exam, ka mukotduma ha ka Supreme Court daw chong bichaar biang ka ha ka 8 tarik uni u bnai.
Discussion about this post