Ki MLA yong ka Congress ynne ka sngi da lai pait lai sylli ki yei pynchna yaka yingkieñ yong ka Dam wa em ha Umiam, wei da chem ki wa emkaam wow thooh noh da kawi ka luti katwa i pynchna dang lai i chakhmat.
Ha kani ka sngi da emlang leh u Saleng A Sangma, u Charles Marngar, u Dr. Celestine Lyngdoh wa u Gabriel Wahlang neitæ ki Engineer na ka chnat PWD (Roads) wa yong ka chnat MeECL kiwa da batai ya ki MLA hajrong i lai i kaam.
Uwa yahkhmat ka Congress Legislature Party (CLP), u Ronnie V Lyngdoh da ong u wa ini i wan pait ki toh hadien wa yoh yei ood i naam ki paidbah kiwa hap lai lyngba katai ka yingkieñ neibhah wa ktah i yei beh kaam neidaw wa joor i sahkut kari ha katai ka thaw.
Da pynsñiaw u leh yei sñiawsuk wow yoo yei lai i kreh wei da kyntu u yaka chnat PWD wow thooh da kawi ka luti kawa ye wow yarap ya ki paidbah chipor wei lada ye wow pynyoh syndon da u sarok wow lai chirta yow lait u lai lyngba na ka yingkieñ yow ye kani ka yingkieñ u neh slem.
Neiliang u Additional Chief Engineer ka MeECL da khana u wa i kreh toh yow pynchna yaka Dam wei da booh thong wow pyndep sa kamwa 4 bnai ya ki bynta wa chajrong iwa daw ktah leh yei wan ki paidbah, katwa ya ki bynta wa chapoh yong ka Dam daw pynchna won rap hadien.
Neiliang u Superintendent Engineer ka chnat PWD (National Highways), da khana u wa ka chnat da phah pait ko ya ki surok yow lai pynyabi yaka East Khasi Hills waka Ri-Bhoi wei hadien wa da tip ya ki tre thaw wei manda dep pynkhreh yaka Report daw leh yeiwa emkaam.
Da khana u wa ya katni da em le tylli ki sarok kiwa ye u lai yow lait nei sahkut kari, kawi toh na Diengpasoh, kawi na Mawsiatkhnam wei neibynta ki kari wa wan naka thaaiñ West Khasi Hills ye ki wow lai lyngba u sarok na Mawmar wa mih cha Ri-Bhoi.
Discussion about this post